കറാച്ചി: ഒന്നര വര്‍ഷത്തെ നാടുവിടലിനു ശേഷം മുന്‍ പ്രസിഡന്റ് ആസിഫ് അലി സര്‍ദാരി പാകിസ്താനില്‍ തിരിച്ചെത്തി. പട്ടാളത്തിന്റെ ഇടപെടല്‍ അതിരുകടക്കുന്നുവെന്ന് ആരോപിച്ച് 2015 ലാണ് പാകിസ്താന്‍ പീപ്പിള്‍ പാര്‍ട്ടി (പി.പി.പി) സഹ ചെയര്‍മാന്‍ കൂടിയായ ആസിഫ് അലി സര്‍ദാരി യു.എ.ഇയിലേക്ക് നാടുവിട്ടത്.

സിന്ധ് വിമാനത്താവളത്തിലെത്തിയ ആസിഫ് അലിയെ സ്വീകരിക്കാന്‍ വന്‍ ജനാവലി തടിച്ചുകൂടിയിരുന്നു. ജനങ്ങളെ അഭിസംബോധന ചെയ്ത സര്‍ദാരി ബേനസീര്‍ ഭൂട്ടോയേയും സുല്‍ഫിക്കല്‍ ഭൂട്ടോയേയും ഓര്‍മ്മിക്കുകയും ചെയ്തു.

മുന്‍ പ്രധാനമന്ത്രി ബേനസീര്‍ ഭൂട്ടോ തന്നെ ലാഹോറിലേക്ക് അയച്ചപ്പോഴുള്ളതിനു സമാനമാണ് ഇപ്പോഴത്തെ ജനക്കൂട്ടമെന്ന് അദ്ദേഹം പ്രതികരിച്ചു.

പാകിസ്താനിലെ നിലവിലെ രാഷ്ട്രീയ സാഹചര്യങ്ങളെയെല്ലാം പരാമര്‍ശിച്ചായിരുന്നു ആസിഫ് അലിയുടെ പ്രസംഗം.

ചൈനാ- പാക് സാമ്പത്തിക ഇടനാഴിയെപ്പറ്റിയും (സി.പി.ഇ.സി) പ്രസംഗത്തിനിടെ പരാമര്‍ശിച്ചു. ഇത് പാകിസ്താന്റെയും ചൈനയുടെയും ഒന്നിച്ചുള്ള മുന്നേറ്റത്തിനുള്ള സമയമാണെന്ന് അദ്ദേഹം പറഞ്ഞു. പാര്‍ലമെന്റില്‍ ജനാധിപത്യത്തിനു വേണ്ടി വിപ്ലവം തുടങ്ങുമെന്നും അദ്ദേഹം പ്രഖ്യാപിച്ചു.