തിരുവനന്തപുരം: യു.എ.പി.എ ചുമത്തി കേസെടുത്ത സംഭവങ്ങള്‍ വിവാദമായതോടെ നിലപാട് വ്യക്തമാക്കി മുഖ്യമന്ത്രി പിണറായി വിജയന്‍ രംഗത്ത്. കാപ്പ, യു.എ.പി.എ എന്നിവയോട് വിയോജിപ്പുണ്ടെന്ന് മുഖ്യമന്ത്രി വ്യക്തമാക്കി. ജനാധിപത്യാവകാശങ്ങള്‍ നിഷേധിക്കരുതെന്നാണ് നിലപാട്. പൊലിസിന്റെ നിയന്ത്രണം നഷ്ടപ്പെട്ടിട്ടില്ലെന്നും അദ്ദേഹം പറഞ്ഞു.

അതിനിടെ, യു.എ.പി.എ ചുമത്തുന്ന കാര്യത്തില്‍ കര്‍ശന നിര്‍ദേശവുമായി ഡി.ജി.പി ലോക്‌നാഥ് ബെഹ്‌റ സര്‍ക്കുലറും പുറത്തിറക്കി. യു.എ.പി.എ ചുമത്തുമ്പോള്‍ ജില്ലാ പൊലിസ് മേധാവിയുടെ അനുമതി വേണമെന്നാണ് പ്രധാന നിര്‍ദേശം. കേസുകള്‍ ചുമത്തുമ്പോള്‍ കൂടുതല്‍ ശ്രദ്ധ പുലര്‍ത്തണമെന്നും സംസ്ഥാനത്തെ പൊലിസ് ഉദ്യോഗസ്ഥര്‍ക്കു നല്‍കിയ സര്‍ക്കുലറില്‍ പറയുന്നു.

എഫ്.ഐ.ആര്‍ തയാറാക്കുമ്പോള്‍ മുതിര്‍ന്ന ഉദ്യോഗസ്ഥരുടെ മേല്‍നോട്ടം ഉറപ്പാക്കണം. രാജ്യദ്രോഹകുറ്റം, എന്‍.ഐ.എ ആക്ട് എന്നിവ പ്രകാരമുള്ള വകുപ്പുകള്‍ ചേര്‍ത്ത് കേസെടുക്കുന്നതിനും അനുമതി വേണമെന്നും ഡി.ജി.പി നിര്‍ദേശിച്ചു.