എടപ്പാള്‍: സംസ്ഥാനത്തെ ഏറ്റവുംവലിയ സാമ്പത്തിക കുറ്റകൃത്യങ്ങളിലൊന്നായ കോലളമ്പ് നിക്ഷേപതട്ടിപ്പ് കേസിന്റെ അന്വേഷണത്തിന്റെ ഭാഗമായുള്ള എന്‍ഫോഴ്‌മെന്റ് നടപടികള്‍ അവസാനഘട്ടത്തില്‍. കേസിലെപ്രതികളുടെ പേരില്‍ കേരളത്തിലും കര്‍ണാടകത്തിലുമുള്ള സ്വത്തുക്കള്‍ കണ്ടുകെട്ടുന്ന നടപടികളാണ് എന്‍ഫോഴ്‌സ്‌മെന്റ് അധികൃതര്‍ പൂര്‍ത്തിയാക്കിയത്.
പണം പലമടങ്ങായി തിരിച്ചുനല്‍കാമെന്ന വാഗ്ദാനംനല്‍കി 2008 മുതല്‍ എടപ്പാള്‍, കുന്നംകുളം മേഖലയിലെ നിരവധി പേരില്‍നിന്നും 2000 കോടിയോളം രൂപ സ്വരൂപിച്ചു മുങ്ങിയതാണ് കേസ്. തട്ടിപ്പുമായി ബന്ധപ്പെട്ട് രജിസ്റ്റര്‍ ചെയ്ത 32 കേസുകളിലായി ആറു പേരെ ക്രൈംബ്രാഞ്ച് അന്വേഷണസംഘം നേരത്തെ അറസ്റ്റ് ചെയ്തിരുന്നു. ആദ്യകാലത്ത് ലോക്കല്‍ പൊലിസ് അന്വേഷിച്ച കേസ് തുടര്‍ന്നു ക്രൈംബ്രാഞ്ചിനും പിന്നീട് സമ്പത്തിക കുറ്റാന്വേഷണ വിമാഗത്തിനും കൈമാറി. തുടര്‍ന്നാണ് അന്വേഷണം ഊര്‍ജിതമായത്.
തട്ടിപ്പിലൂടെ സ്വരൂപിച്ച പണമുപയോഗിച്ചു വാങ്ങിക്കൂട്ടിയ ഭൂമിയെ കുറിച്ചുള്ള വിവരങ്ങള്‍ അന്വേഷണ സംഘത്തിന് ഇതോടെ വ്യക്തമായിരുന്നു. ഒരു വര്‍ഷത്തിലധികമായി എന്‍ഫോഴ്‌മെന്റ് അധികൃതര്‍ ഈ വസ്തു വകകളുടെ ഏറ്റെടുക്കല്‍ നടപടികളുമായി മുന്നോട്ടുപോകുകയായിരുന്നു. പൊന്നാനി, കോലളമ്പ്, എടപ്പാള്‍, കുന്നംകുളം, പെരുമ്പടപ്പ്, ബംഗളൂരു എന്നിവിടങ്ങളിലായി വീടും ഭൂമിയുമുള്‍പ്പെടെ 37 വസ്തുവകകളും പണവുമാണ് ഇതുവരെ കണ്ടുകെട്ടിയത്.
ഒരു കോടി പത്തുലക്ഷം രൂപ പണമായും ഏതാണ്ട് 150 കോടിയോളം രൂപ വിലവരുന്ന സ്വത്തുക്കളുമാണ് ഇതുവരെ കണ്ടുകെട്ടിയിട്ടുള്ളത്. രേഖകള്‍ പ്രകാരം മൂന്നു കോടിയുടെ മൂല്യമാണ് രേഖപ്പെടുത്തിയിട്ടുള്ളതെങ്കിലും ഇവയ്ക്ക് ഇപ്പോള്‍ 150 കോടിയോളം രൂപ മൂല്യംവരുമെന്നാണ് കേസില്‍ പണം നഷ്ടപ്പെട്ടവര്‍ പറയുന്നത്. കണ്ടുകെട്ടിയ സ്വത്തുക്കളില്‍ എന്‍ഫോഴ്‌സ്‌മെന്റ് അധികൃതര്‍ ബോര്‍ഡുകള്‍ സ്ഥാപിച്ചു.
നിക്ഷേപം തിരിച്ചുകിട്ടുന്ന വിഷയത്തില്‍ നിക്ഷേപകര്‍ മുഖ്യമന്ത്രി പിണറായി വിജയനും സ്ഥലം എം.എല്‍.എയും മന്ത്രിയുമായ കെ.ടി ജലീലിനും അപേക്ഷ നല്‍കിയിട്ടുണ്ട്.