കൊണ്ടോട്ടി: കൊണ്ടോട്ടി വലിയതോട്ടിലെ കെട്ടിനിര്‍ത്തിയ വെള്ളം മാലിന്യം കലര്‍ന്ന് ദുര്‍ഗന്ധപൂരിതമായി. കൊണ്ടോട്ടി പതിനേഴ് ദയാനഗര്‍ ഭഗാത്താണ് വെള്ളത്തില്‍നിന്നു ദുര്‍ഗന്ധംവമിച്ചുതുടങ്ങിയത്.
മൂക്കുപൊത്താതെ ഇതുവഴി പോകാന്‍ കഴിയാത്ത അവസ്ഥയാണ്. വെള്ളത്തിന്റെ നിറംമാറിയിട്ടുമുണ്ട്. കടുത്ത വേനലിനെ അതിജീവിക്കാനായി തടയണ കെട്ടി നിര്‍ത്തിയ ജലമാണ് മലിനമായി മാറിയത്. തോട്ടില്‍ മാലിന്യം നിറഞ്ഞിട്ടുമുണ്ട്.
വേനലില്‍ തോട് മാലിന്യം പൂര്‍ണമായും നീക്കംചെയ്ത് സംരക്ഷിക്കണമെന്നാണ് നാട്ടുകാരുടെ ആവശ്യം. തോട്ടിലേക്ക് മാലിന്യം തള്ളുന്നവരെ നിയമത്തിനുമുന്നില്‍ കൊണ്ടുവരണമെന്നും നാട്ടുകാര്‍ ആവശ്യപ്പെടുന്നു.