സാമൂഹ്യമാധ്യമങ്ങളിലൂടെ അതിശയോക്തി കലര്‍ത്തി നടക്കുന്ന പ്രചാരണങ്ങളാണ് ഭിക്ഷാടന മാഫിയയുമായി ബന്ധപ്പെട്ട നിരോധന ബോര്‍ഡുകള്‍ ഉയരാന്‍ പ്രേരകമായിട്ടുള്ളത്. ഇതു പലയിടങ്ങളിലും സദാചാര പൊലിസ് ചമയുന്നവര്‍ക്കു പുതുജീവന്‍ നല്‍കാനെ ഉപകരിക്കൂ. യാചന പ്രേത്സാഹിപ്പിക്കപ്പെടേണ്ടതല്ല. എന്നാല്‍, വ്യക്തമായ നയരേഖയില്ലാതെ എഴുതിവയ്ക്കുന്ന പ്രഖ്യാപനങ്ങളുടെ മറവില്‍ ആരും പീഡിപ്പിക്കപ്പെടരുത്.
ദിനേന വന്നുകൊണ്ടിരിക്കുന്ന പ്രഖ്യാപനങ്ങള്‍ നടപ്പാക്കുന്നതു നിയമപാലകര്‍ക്കു പകരം സദാചാര പൊലിസാണ്. ക്ലബുകള്‍പോലും തോന്നിയരീതിയില്‍ യാചകമുക്ത ഗ്രാമങ്ങള്‍ സൃഷ്ടിക്കുന്നത് അഭിലഷണീയമല്ല. പ്രഖ്യാപന ബോര്‍ഡുകള്‍ സ്ഥാപിച്ച് ഉത്തരവാദിത്തങ്ങളില്‍നിന്ന് ഒളിച്ചോടുന്നതിനു മുന്‍പായി യാചകരുടെ പ്രശ്‌നങ്ങള്‍ പരിഹരിക്കാനാണ് സമൂഹം മുന്നിട്ടിറങ്ങേണ്ടത്.
സുതാര്യമായി പ്രവര്‍ത്തിച്ചുകൊണ്ടിരിക്കുന്ന സ്ഥാപങ്ങളുടെയും ജീവകാരുണ്യ പ്രവര്‍ത്തങ്ങളുടെയും ധനശേഖരണം ഇതിന്റെ മറവില്‍ തടയപ്പെടരുത്. യാചകരുടെ കഴിവും അഭിരുചിയും തിരിച്ചറിഞ്ഞു പുതിയ പുനരധിവാസ പദ്ധതികള്‍ നടപ്പിലാക്കാന്‍ സര്‍ക്കാറുകള്‍ മുന്‍കൈയെടുക്കണം. സ്ഥാപനങ്ങളുടെയും മറ്റും പിരിവ് നടത്തുന്നവര്‍ക്ക് തിരിച്ചറിയല്‍ കാര്‍ഡ് നല്‍കിയും അന്യസംസ്ഥാന കച്ചവടക്കാര്‍ക്ക് പൊലിസ് സ്റ്റേഷനുകളില്‍ റിപ്പോര്‍ട്ട് ചെയ്യാനുള്ള സംവിധാനം ഫലപ്രധമായി ഉപയോഗപ്പെടുത്തിയും ഒരുപരിധിവരെ പ്രശ്‌നപരിഹാരം സാധ്യമാകും.