കാസര്‍കോട്: ബീവറേജ് ഔട്ട്‌ലറ്റില്‍ നിന്ന് അനധികൃതമായി 45 കുപ്പി മദ്യം കടത്തിയ ആള്‍ വാഹനവുമായി പിടിയില്‍. ഇടപാടിനെത്തിയ കെ.എസ്.ആര്‍.ടി.സി ഡ്രൈവര്‍ പൊലിസിനെ കണ്ട് ഓടി രക്ഷപ്പെട്ടു. രാവണേശ്വരം പുല്ലാഞ്ഞിക്കുടിയിലെ കെ അനില്‍ കുമാറി(46)നെയാണു കാസര്‍കോട് ടൗണ്‍ സി.ഐ അബ്ദുല്‍ റഹീമിന്റെയും എസ്.ഐ ഹസൈനാര്‍ കുട്ടിയുടെയും നേതൃത്വത്തിലുള്ള സംഘം അറസ്റ്റു ചെയ്തത്. മദ്യം ഏറ്റുവാങ്ങാനെത്തിയ കാഞ്ഞങ്ങാട് ഡിപ്പോയിലെ ഡ്രൈവര്‍ ഉപേന്ദ്രനെതിരേയാണു കേസ്. ഇയാള്‍ സംഭവ സ്ഥലത്തു നിന്ന് ഓടി രക്ഷപ്പെടുകയായിരുന്നുവെന്നു പൊലിസ് പറഞ്ഞു.
കഴിഞ്ഞ ദിവസം വൈകിട്ടാണു സംഭവം. കാസര്‍കോട് കെ.എസ്.ആര്‍.ടി.സി ഡിപ്പോക്കു സമീപത്തുള്ള ബീവറേജ് ഔട്ട്‌ലറ്റില്‍ നിന്ന് അനധികൃതമായി മദ്യം കടത്തുന്നതു സംബന്ധിച്ച് 'സുപ്രഭാതം' വാര്‍ത്ത നല്‍കിയിരുന്നു. ഇതേ തുടര്‍ന്ന് എക്‌സൈസും പൊലിസും വാങ്ങാനെത്തുന്നവരെ നിരീക്ഷിച്ചു വരികയായിരുന്നു. അനില്‍ കുമാര്‍ സ്‌കൂട്ടറില്‍ കടത്തിക്കൊണ്ടുവന്ന മദ്യം ഉപേന്ദ്രനു കൈമാറുന്നതിനിടയിലാണു പൊലിസ് എത്തിയത്.