മെല്‍ബണ്‍: ആസ്‌ത്രേലിയയും പാകിസ്താനും തമ്മിലുള്ള ബോക്‌സിങ് ഡേ ക്രിക്കറ്റ് ടെസ്റ്റിന്റെ ആദ്യ ദിനം മഴയില്‍ കുതിര്‍ന്നപ്പോള്‍ കളി നേരത്തെ അവസാനിപ്പിച്ചു. 50.5 ഓവര്‍ മാത്രമാണ് അദ്യ ദിനം പന്തെറിയാനായത്.
ടോസ് നേടി പാകിസ്താന്‍ ബാറ്റിങ് തിരഞ്ഞെടുക്കുകയായിരുന്നു. കളി നിര്‍ത്തുമ്പോള്‍ അവര്‍ നാലു വിക്കറ്റ് നഷ്ടത്തില്‍ 142 റണ്‍സെന്ന നിലയില്‍ പതറുന്നു. 66 റണ്‍സോടെ ഓപണര്‍ അസ്ഹര്‍ അലിയും നാലു റണ്‍സോടെ ആസാദ് ഷെഫീഖുമാണ് ക്രീസില്‍.
സമി അസ്‌ലം (ഒന്‍പത്), ബാബര്‍ അസം (23). യൂനിസ് ഖാന്‍ (21), മിസ്ബ ഉള്‍ ഹഖ് (11) എന്നിവരുടെ വിക്കറ്റുകളാണ് പാകിസ്താനു നഷ്ടമായത്. ഓസീസ് നിരയില്‍ ജാക്‌സണ്‍ ബേഡ് രണ്ടു വിക്കറ്റും ഹാസ്‌ലെവുഡ്, നതാന്‍ ലിയോണ്‍ എന്നിവര്‍ ഓരോ വിക്കറ്റും വീഴ്ത്തി. ആദ്യ മത്സരം ജയിച്ച് ഓസീസ് പരമ്പരയിലെ 1-0നു മുന്നില്‍.