തൃശൂര്‍: സംഘടനാപരമായ കരുത്ത് ആര്‍ജിക്കുന്നതിനും പാര്‍ട്ടിയെ ശക്തിപ്പെടുത്തുന്നതിനും മുതിര്‍ന്ന നേതാക്കള്‍ മിതത്വം പാലിക്കണമെന്ന് കെ.പി.സി.സി വൈസ് പ്രസിഡന്റ് വി.ഡി സതീശന്‍. ഡി.സി.സി പ്രസിഡന്റുമാരുടെ മാറ്റത്തോടെ കേരളത്തിലെ കോണ്‍ഗ്രസിന് പുതിയ ഉത്സാഹം ഉണ്ടായി. പുതിയ നേതാക്കളെചൊല്ലി പാര്‍ട്ടിയിലോ അണികള്‍ക്കിടയിലോ ഇതുവരെ പ്രതിഷേധത്തിന്റെ ഒരു ഇലയനക്കം പോലും ഉണ്ടായിട്ടില്ല. സജീവ പ്രതിപക്ഷമായി മുന്നേറുന്നതിനാണ് കോണ്‍ഗ്രസ് ഇപ്പോള്‍ ശ്രമിക്കുന്നത്. കേന്ദ്ര-സംസ്ഥാന ഭരണത്തിനെതിരേ വലിയ ജനരോഷമാണ് നിലവിലുള്ളത്. അതിനാലാണ് പരിമിതികള്‍ക്കുള്ളിലും സമരങ്ങള്‍ നയിക്കാന്‍ പാര്‍ട്ടി ശ്രമിക്കുന്നത്.
കോണ്‍ഗ്രസിന്റെ പ്രവര്‍ത്തനം കുറച്ചുകൂടി നന്നാകണം എന്നുദ്ദേശിച്ചാണ് പല നേതാക്കളും തങ്ങളുടെ അഭിപ്രായങ്ങള്‍ പരസ്യപ്പെടുത്തുന്നതെന്നും വി.ഡി സതീശന്‍ പറഞ്ഞു. തൃശൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.