വാഴക്കാട്: സമസ്തയുടെ രൂപീകരണം മുതല്‍ മുശാവറ അംഗവും രണ്ടര പതിറ്റാണ്ട് കാലം പ്രസിഡന്റുമായിരുന്ന കണ്ണിയത്ത് അഹമ്മദ് മുസ്‌ലിയാരുടെ ഇരുപത്തിനാലാം മഖാം ഉറൂസിന് വാഴക്കാട്ട് ഭക്തിസാന്ദ്രമായ തുടക്കം. മഖാം സിയാറത്തോടെ തുടക്കം കുറിച്ച പരിപാടിയില്‍ സമസ്ത ട്രഷറര്‍ സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പതാക ഉയര്‍ത്തി. സയ്യിദ് മാനു തങ്ങള്‍, സയ്യിദ് ബി.എസ്.കെ തങ്ങള്‍, സയ്യിദ് കുഞ്ഞിസീതിക്കോയ തങ്ങള്‍, സയ്യിദ് ഹബീബ് തങ്ങള്‍, പി.എ ജബ്ബാര്‍ ഹാജി, കെ.എസ് ഇബ്‌റാഹീം മുസ്‌ലിയാര്‍, കണ്ണിയത്ത് അബ്ദുള്ളക്കുട്ടി മുസ്‌ലിയാര്‍, കണ്ണിയത്ത് കുഞ്ഞിമോന്‍ മുസ്‌ലിയാര്‍, വലിയുദ്ദീന്‍ ഫൈസി, ടി.പി അബ്ദുല്‍ അസീസ് തുടങ്ങിയവര്‍ പങ്കെടുത്തു. വൈകുന്നേരം ഏഴിന് നടന്ന മതപ്രഭാഷണത്തില്‍ സയ്യിദ് നാസര്‍ ഹയ്യ് ശിഹാബ് തങ്ങള്‍ അധ്യക്ഷനായി. സിംസാറുല്‍ഹഖ് ഹുദവി പ്രഭാഷണം നടത്തി.
ഇന്ന് വൈകുന്നേരം ഏഴിന് നടക്കുന്ന മതപ്രഭാഷണം പാണക്കാട് സയ്യിദ് സ്വാദിഖലി ശിഹാബ് തങ്ങള്‍ ഉദ്ഘാടനം ചെയ്യും. ഇ.ടി മുഹമ്മദ് ബഷീര്‍ എം.പി അധ്യക്ഷനാകും.നൗഷാദ് ബാഖവി ചിറയിന്‍കീഴ് മുഖ്യപ്രഭാഷണം നടത്തും. ജനുവരി രണ്ടിന് രാവിലെ എട്ടിന് നടക്കുന്ന സമാപന പ്രാര്‍ഥാന സംഗമത്തോടെയാണ് ഏഴു ദിവസം നീണ്ടുനില്‍ക്കുന്ന ഉറൂസിന് സമാപനമാവുക .