റിയാദ്: ഭരണകൂട ഭീകരതയുടെ ഇരകളായ തുല്യതയില്ലാത്ത പീഡനം അനുഭവിക്കുന്ന സിറിയന്‍ ജനതയ്ക്ക് സഹായഹസ്തവുമായി സൗദി അറേബ്യ. സിറിയയ്ക്ക് സഹായമേകാനായി രാജ്യവ്യാപക ക്യാംപയിന്‍ നടത്താന്‍ സഊദി ഭരണാധികാരി സല്‍മാന്‍ രാജാവാണ് ഉത്തരവിട്ടത്. സര്‍വസ്വവും ഉപേക്ഷിച്ച് അലപ്പോയില്‍ നിന്നും പാലായനം ഫണ്ടിലേക്ക് രാജ്യത്തെ ഓരോരുത്തരും സംഭാവന നല്‍കണമെന്ന് രാജാവ് ആഹ്വാനം ചെയ്തിട്ടുണ്ട്.

രാജ്യത്തു നിന്നാകെ 100 മില്യണ്‍ സഊദി റിയാല്‍ നല്‍കണമെന്നാണ് ലക്ഷ്യമിടുന്നത്. സിറിയന്‍ ജനതക്കുള്ള ഭക്ഷണം, അഭയം, മരുന്ന്, ചികിത്സ, താല്‍ക്കാലിക ടെന്റ് നിര്‍മാണം തുടങ്ങിയ അവശ്യസാധനങ്ങള്‍ക്കാണ് തുക ചിലവഴിക്കുക. കാംപയിനിന്റെ ആദ്യപടിയായി സല്‍മാന്‍ രാജാവ് തന്നെ 20 മില്യണ്‍ റിയാല്‍ ഫണ്ടിലേക്ക് സംഭാവന ചെയ്തു.

ഇത്തരത്തില്‍ സമാഹരിച്ച തുക ഉപയോഗിച്ച് കിങ് സല്‍മാന്‍ എയ്ഡ്ന്റ ആന്റ് റിലീഫ് സെന്റര്‍ നേതൃത്വത്തിലാണ് സന്നദ്ധ സേവന പ്രവര്‍ത്തനങ്ങള്‍ നടത്തുക. ഇതോടെപ്പം ശൈത്യകാലത്തെ പ്രതിരോധിക്കുന്നതിനുള്ള സമഗ്രമായ അടിയന്തര സഹായം റിലീഫ് സെന്റര്‍ ഇപ്പോഴും തുടരുന്നുണ്ട്.