റിയാദ്: ഭരണകൂട ഭീകരതയുടെ ഇരകളായി തുല്യതയില്ലാത്ത പീഡനം അനുഭവിക്കുന്ന സിറിയന്‍ ജനതയ്ക്ക് സഹായഹസ്തവുമായി സഊദി അറേബ്യ. സിറിയയ്ക്ക് സഹായമേകാനായി രാജ്യവ്യാപക ക്യാംപയിന്‍ നടത്താന്‍ സഊദി ഭരണാധികാരി സല്‍മാന്‍ രാജാവാണ് ഉത്തരവിട്ടത്.

സര്‍വ്വസ്വവും ഉപേക്ഷിച്ച് അലപ്പോയില്‍ നിന്നും പലായനം ചെയ്യുന്നവര്‍ക്കുള്ള ഫണ്ടിലേക്ക് രാജ്യത്തെ ഓരോ പൗരനും സംഭാവന നല്‍കണമെന്ന് രാജാവ് ആഹ്വനം ചെയ്തു.

രാജ്യത്തു നിന്നാകെ 100 മില്യണ്‍ സഊദി റിയാല്‍ നല്‍കണമെന്നാണ് ലക്ഷ്യമിടുന്നത്. സിറിയന്‍ ജനതക്കള്ള ഭക്ഷണം, അഭയം, മരുന്ന്, ചികിത്സ, താല്‍കാലിക ടെന്റ് നിര്‍മാണം തുടങ്ങിയ അവശ്യസാധനങ്ങള്‍ക്കാണ് തുക ചിലവഴിക്കുക. ക്യാംപയിനിന്റെ ആദ്യപടിയായി സല്‍മാന്‍ രാജാവ് തന്നെ 20 മില്യണ്‍ റിയാല്‍ ഫണ്ടിലേക്ക് സംഭാവന ചെയ്തു.

കൂടാതെ കിരീടാവകാശി മുഹമ്മദ് ബിന്‍ നൈഫ് 10 മില്യണ്‍ റിയാലും, ഡെപ്യുട്ടി കിരീടാവകാശി മുഹമ്മദ് ബിന്‍ സല്‍മാന്‍ 8 മില്യണ്‍ റിയാലും വീതം നല്‍കി.

ഇത്തരത്തില്‍ സമാഹരിച്ച തുക ഉപയോഗിച്ച് കിംഗ് സല്‍മാന്‍ എയ്ഡ് ആന്റ് റിലീഫ് സെന്ററിന്റെ നേതൃത്വത്തിലാണ് സന്നദ്ധ സേവന പ്രവര്‍ത്തനങ്ങള്‍ നടത്തുക. ഇതോടെപ്പം ശൈത്യകാലത്തെ പ്രതിരോധിക്കുന്നതിനുള്ള സമഗ്രമായ അടിയന്തിര സഹായം റിലീഫ് സെന്റര്‍ ഇപ്പോഴും തുടരുന്നുണ്ട്.