ഹൈദരാബാദ്: ബി.കോമിന് പഠിച്ചത് കണക്കും ഫിസിക്‌സുമാണെന്ന് ആന്ധ്രാപ്രദേശ് എം.എല്‍.എ. സംസ്ഥാനത്തെ ഭരണപക്ഷമായ തെലുങ്ക് ദേശം പാര്‍ട്ടിയുടെ എം.എല്‍.എ ജലീല്‍ ഖാന്‍ ആണ് ചാനല്‍ ചര്‍ച്ചക്കിടയില്‍ തന്റെ വിദ്യാഭ്യാസ യോഗ്യത പറഞ്ഞ് മാധ്യമ പ്രവര്‍ത്തകരെ ഞെട്ടിച്ചത്. ബി.കോം ബിരുദം നേടാന്‍ കാരണം ഭൗതിക ശാസ്ത്രത്തോടും കണക്കിനോടുമുള്ള അമിതമായ താല്‍പര്യമാണെന്നും അദ്ദേഹം പറഞ്ഞു. കണക്കില്‍ 100ല്‍ 100 മാര്‍ക്കുണ്ടായിരുന്നുവെന്നും എം.എല്‍. എ വെളിപ്പെടുത്തി.
കൊമോഴ്‌സിനോടുള്ള താല്‍പര്യം മൂലമാണോ ബി.കോമിന് പഠിച്ചതെന്ന ചോദ്യത്തോട് പ്രതികരിക്കുകയായിരുന്നു എം.എല്‍.എ. കണക്കും ഫിസിക്‌സും ബി.കോം സിലബസില്‍ ഇല്ലെന്ന് ബി.കോം ബിരുദധാരിയായ അവതാരകന്‍ പറഞ്ഞു തിരുത്താന്‍ ശ്രമിച്ചെങ്കിലും ജലീല്‍ ഖാന്‍ ഇത് സമ്മതിച്ചു കൊടുക്കാന്‍ തയ്യാറായില്ല.