ബെയ്റൂത്ത്: അവലോകനയോഗം നടക്കുന്നതിനിടെ ലബനാനിലെ മുനിസിപ്പൽ ആസ്ഥാനത്തിനു നേരെ ഇസ്റാഈൽ നടത്തിയ ആക്രമണത്തിൽ മേയറും ജീവനക്കാരും കൊല്ലപ്പെട്ടു. ദക്ഷിണ ലബനാനിലെ പ്രധാനനഗരങ്ങളിലൊന്നായ നബാതിയ മേയർ ഡോ. അഹമ്മദ് ഖെയിൽ ഉൾപ്പെടെ എട്ടുപേരാണ് കൊല്ലപ്പെട്ടത്.

അമ്പതു പേർക്കു പരുക്കേറ്റു. ഇന്നലെ രാവിലെയാണ് സംഭവം. മുനിസിപ്പൽ ഓഫിസിന് സമീപത്തെ ക്ലിനിക്കും ആക്രമണത്തിൽ തകർന്നു. കൊല്ലപ്പെട്ടവരിൽ രണ്ടു ഡോക്ടർമാരും ഉൾപ്പെടും. മുനിസിപ്പാലിറ്റിയുടെ ദുരിതാശ്വാസപ്രവർത്തനങ്ങൾ സംബന്ധിച്ച അവലോകനയോഗത്തെ മനപ്പൂർവം ഇസ്റാഈൽ ലക്ഷ്യംവയ്ക്കുകയായിരുന്നുവെന്ന് ലബനീസ് പ്രധാനമന്ത്രി നജീബ് മീഖാതി പറഞ്ഞു.

ഹിസ്ബുല്ലയുടെ മറവിൽ സയണിസ്റ്റുകൾ സാധാരണക്കാരെയാണ് ലക്ഷ്യംവയ്ക്കുന്നതെന്നും അദ്ദേഹം ആരോപിച്ചു.
ഒരുഡസനോളം ആക്രമണങ്ങളാണ് 24 മണിക്കൂറിനുള്ളിൽ ഇസ്റാഈൽ ബെയ്റൂത്തിലും സമീപപ്രദേശങ്ങളിലും നടത്തിയത്. തലസ്ഥാനമായ ബെയ്റൂത്തിലെ മാർക്കറ്റിലുൾപ്പെടെ ഇസ്റാഈൽ മിസൈൽ വർഷിച്ചു. 32 പേർ കൊല്ലപ്പെട്ടു.

ഇതോടൊപ്പം ഹിസ്ബുല്ലയുടെ ഭാഗത്തുനിന്ന് പ്രത്യാക്രമണവും ഉണ്ടാകുന്നുണ്ട്. മസ്‌കാഫിൽ ഇസ്റാഈൽ സൈന്യത്തെ ലക്ഷ്യംവച്ച്ഹിസ്ബുല്ലയുടെ റോക്കറ്റുകൾ ആക്രമണം നടത്തി. കർമെയ്ലിലെ കുടിയേറ്റകേന്ദ്രങ്ങൾക്കു നേരെയും ഹിസ്ബുല്ലയുടെ റോക്കറ്റുകൾ പതിച്ചു. നിരവധി റോക്കറ്റുകളാണ് ഹിസ്ബുല്ല ഇസ്റാഈൽ കേന്ദ്രങ്ങൾ ലക്ഷ്യംവച്ച് തൊടുത്തുവിട്ടത്.
കഴിഞ്ഞവർഷം ഒക്ടോബർ മുതൽ ലബനാനിൽ ഇസ്റാഈൽ നടത്തിവരുന്ന ആക്രമണങ്ങളിൽ ഇതുവരെ 2350 പേരാണ് കൊല്ലപ്പെട്ടത്.