കളമശേരി: കാര്‍ ബൈക്കില്‍ ഇടിച്ച് ബൈക്കില്‍ സഞ്ചരിച്ചിരുന്ന രണ്ട് യുവാക്കള്‍ക്ക് പരുക്കേറ്റു. ഇടപ്പള്ളി മാപ്പള്ളിപറമ്പ് ഈറശേരി ജോസഫിന്റെ മകന്‍ അഖില്‍ ജോസഫ് (19), പാലാരിവട്ടം ആലിന്‍ ചുവട് പേട്ടത്തില്‍ പറമ്പില്‍ സുധന്റെ മകന്‍ അക്ഷയ് കുമാര്‍ (18) എന്നിവര്‍ക്കാണ് പരുക്കേറ്റത്. അഖില്‍ ജോസഫിന്റെ പരുക്ക് ഗുരുതരമാണ്. ശസ്ത്രക്രിയക്ക് ശേഷം വെന്റിലേറ്ററിലാണ്. അപകടത്തെ തുടര്‍ന്ന് ഇരുവരെയും കളമശ്ശേരി കിംസ് ആസ്പത്രിയില്‍ പ്രവേശിപ്പിച്ചു.
അക്ഷയ് കുമാറിന്റെ കൈയ്യിനും കാലിനും ഒടിവുണ്ട്. സാമ്പത്തിക ശേഷി കുറവായതിനാല്‍ അക്ഷയ് കുമാറിനെ പ്രഥമ ശുശ്രൂഷക്ക് ശേഷം എറണാകുളം ഗവണ്‍മെന്റ് മെഡിക്കല്‍ കോളജിലേക്ക് മാറ്റി. വെള്ളിയാഴ്ച രാവിലെ പതിനൊന്നിനോടെയായിരുന്നു അപകടം.
ആലുവ ഭാഗത്ത് നിന്നും ദേശീയ പാതയിലൂടെ വരികയായിരുന്ന കാര്‍ ഞാലകം ജുമാ മസ്ജിദിന് മുന്നിലെ റോഡിലേക്ക് പ്രവേശിക്കുന്നതിനിടെ ദേശീയ പാതയിലൂടെ ഇടപ്പള്ളി ഭാഗത്ത് നിന്ന് വരികയായിരുന്ന ബൈക്കുമായി കൂട്ടിയിടിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു.