തൃക്കരിപ്പൂര്‍: കോഴിക്കോട് നടക്കുന്ന സന്തോഷ് ട്രോഫി സോണല്‍ മത്സരങ്ങള്‍ക്കുള്ള കേരളാ ടീമില്‍ തൃക്കരിപ്പൂര്‍ എടാട്ടുമ്മല്‍ സ്വദേശി എം നജേഷ് ജഴ്‌സി അണിയും. കഴിഞ്ഞ തവണ സന്തോഷ് ട്രോഫി ക്യാംപില്‍ അവസാന നിമിഷം സ്ഥാനം നഷ്ടപ്പെട്ട നാജേഷ് ഇക്കുറി ടീമില്‍ ഇടം കണ്ടെത്തി. വാസ്‌കോ ഗോവക്കു വേണ്ടി കളിക്കുന്ന നജേഷ് എടാട്ടുമ്മല്‍ സുബാഷ് സ്‌പോര്‍ട്‌സ് ക്ലബിലൂടെയാണ് ഫുട്‌ബോള്‍ രംഗത്തേക്ക് വന്നത്, എം.ആര്‍.സി. എഫ്.സി, കൊച്ചിന്‍ ഈഗിള്‍സ് എഫ്.സി എന്നീ ടീമുകള്‍ക്ക് വേണ്ടിയും കളിച്ചിട്ടുണ്ട്. കഴിഞ്ഞ തവണ സംസ്ഥാന ചാംപ്യന്‍മാരായ കാസര്‍കോട് ജില്ലാ സീനിയര്‍ ടീമംഗമാണ്. ടി നാരായണന്‍, ജാനകി ദമ്പതികളുടെ മകനാണ്.