മെല്‍ബണ്‍: ക്രിക്കറ്റ് ആസ്‌ത്രേലിയയുടെ 2016ലെ ടി20 ലോക ടീമിന്റേയും നായകന്‍ വിരാട് കോഹ്‌ലി തന്നെ. നേരത്തെ ഏകദിന ടീമിന്റെ നായകനായതിന്റെ പിന്നാലെയാണ് ക്രിക്കറ്റ് ആസ്‌ത്രേലിയ ടി20 നായക സ്ഥാനത്തും കോഹ്‌ലിയെ തിരഞ്ഞെടുത്തത്. അതേ സമയം ഓസീസ് ക്യാപ്റ്റന്‍ സ്റ്റീവന്‍ സ്മത്തിനു ടീമില്‍ സ്ഥാനം ലഭിച്ചില്ല.
നേരത്തെ ഐ.സി.സിയുടെ ഏകദിന ടീമിന്റെ നായകനായും കോഹ്‌ലിയെ തിരഞ്ഞെടുത്തിരുന്നു. കോഹ്‌ലിക്കൊപ്പം ഏകദിന ടീമില്‍ ഇടം പിടിച്ച ജസ്പ്രീത് ബുമ്‌റ ടി20 ടീമിലും ഇടംകണ്ടു. മറ്റൊരു ഇന്ത്യന്‍ താരങ്ങള്‍ക്കും അവസരം ലഭിച്ചില്ല. ഇന്ത്യയെ കൂടാതെ ഇംഗ്ലണ്ട്, ആസ്‌ത്രേലിയ, ദക്ഷിണാഫ്രിക്ക ടീമുകളില്‍ നിന്നായി രണ്ടു പേര്‍ വീതം ഇലവനിലുണ്ട്.
 ഓസീസ് താരം ഡേവിഡ് വാര്‍ണറും ഇംഗ്ലണ്ടിന്റെ ജേസണ്‍ റോയിയുമാണ് ടീമിലെ ഓപണ്‍മാര്‍. വിക്കറ്റ് കീപ്പര്‍ ബാറ്റ്‌സ്മാനായി ഇംഗ്ലണ്ടിന്റെ ജോസ് ബട്‌ലറും ഇടം പിടിച്ചു. ദക്ഷിണാഫ്രിക്കന്‍ താരം എ.ബി ഡിവില്ല്യേഴ്‌സും ടീമിലുണ്ട്. ഓള്‍റൗണ്ടര്‍മാരായി പാകിസ്താന്റെ ഷഹീദ് അഫ്രീദി, വെസ്റ്റിന്‍ഡീസിന്റെ ആന്ദ്രെ റസ്സല്‍, ദക്ഷിണാഫ്രിക്കയുടെ ഫര്‍ഹാന്‍ ബെഹാര്‍ദിന്‍ എന്നിവരാണുള്ളത്. ബൗളിങ് നിരയ്ക്ക് ശക്തി പകരാന്‍ ആദം സാംപ, ജസ്പ്രിത് ബുമ്‌റ എന്നിവര്‍ക്കൊപ്പം ബംഗ്ലാദേശ് താരം മുസ്തഫിസുര്‍ റഹ്മാനും ഇടംപിടിച്ചു.