വാഴക്കാട്: പ്രവാചകചര്യ ജീവിതത്തില്‍ പകര്‍ത്തുമ്പോഴാണ് ജിവിതം ധന്യമാകുന്നതെന്നും സുന്നത്തുകളെ മുറുകെ പിടിക്കാന്‍ വിശ്വാസികള്‍ തയാറാകണമെന്നും കോഴിക്കോട് വലിയ ഖാസി സയ്യിദ് നാസര്‍ ഹയ്യ് ശിഹാബ് തങ്ങള്‍. വാഴക്കാട് കണ്ണിയത്ത് ഉസ്താദ് ഇരുപത്തിനാലാം മഖാം ഉറൂസിലെ അഞ്ചാം ദിവസത്തിലെ മതപ്രഭാഷണ വേദിയില്‍ ആമുഖ പ്രഭാഷണം നടത്തി സംസാരിക്കുകയായിരുന്നു അദ്ദേഹം.
സയ്യിദ് ബി.എസ്.കെ തങ്ങള്‍ അധ്യക്ഷനായി. കേരള വഖഫ് ബോര്‍ഡ് ചെയര്‍മാന്‍ സയ്യിദ് റഷീദലി ശിഹാബ് തങ്ങള്‍ ഉദ്ഘാടനം ചെയ്തു. സയ്യിദ് മാനുതങ്ങള്‍ വെള്ളൂര്‍ ജലാലിയ്യ റാത്തീബിന് നേതൃത്വം നല്‍കി. അഷ്‌റഫ് റഹ്മാനി കാസര്‍കോട് മുഖ്യ പ്രഭാഷണം നടത്തി. പാലപ്ര മുഹമ്മദലി ഹാജി, നിയാസ് എറണാകുളം, ഉണ്ണീന്‍ ഹാജി, അലി അക്ബര്‍ സംസാരിച്ചു. ഇന്നു രാവിലെ എട്ടിനു നടക്കുന്ന പ്രാര്‍ഥനാ സമ്മേളനത്തോടെ ഉറൂസ് സമാപിക്കും.
സമാപന സമ്മേളനം സയ്യിദ് ഹൈദരലി ശിഹാബ് തങ്ങള്‍ഉദ്ഘാടനം ചെയ്യും. സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ അധ്യക്ഷനാകും. സയ്യിദ് നാസര്‍ ഹയ്യ് തങ്ങള്‍, സയ്യിദ് മുഹമ്മദ്‌കോയ തങ്ങള്‍ ജമലുല്ലൈലി, കെ. ആലിക്കുട്ടി മുസ്‌ലിയാര്‍, എം.ടി അബ്ദുള്ള മുസ്‌ലിയാര്‍, അബ്ദുല്‍ഹമീദ് ഫൈസി അമ്പലക്കടവ് സംസാരിക്കും. അബ്ദുസ്സമദ് പൂക്കോട്ടൂര്‍ അനുസ്മരണ പ്രഭാഷണം നടത്തും. വാവാട് കുഞ്ഞിക്കോയ മുസ്‌ലിയാര്‍ സമാപന പ്രാര്‍ഥനയ്ക്കു നേതൃത്വം നല്‍കും. കാല്‍ ലക്ഷം പേര്‍ക്ക് അന്നദാനവും നടത്തും.