കണ്ണൂര്‍: വികസന പ്രവര്‍ത്തനങ്ങളില്‍ ചെമ്പിലോട് പഞ്ചായത്തിന് വീണ്ടും ദേശീയ അംഗീകാരം. കേരളത്തില്‍ ആദ്യമായി നടപ്പാക്കിയ പ്ലാസ്റ്റിക് റീസൈക്ലിങ് പ്ലാന്റിനു ദേശീയ അംഗീകാരം ലഭിച്ചതിനു പിന്നാലെ ദേശീയതലത്തില്‍ സംഘടിപ്പിച്ച ഷോര്‍ട്ട് ഫിലിം മത്സരത്തിലും ചെമ്പിലോട് പഞ്ചായത്തിലെ പ്ലാസ്റ്റിക് റീസൈക്ലിങ് ചിത്രീകരിച്ച അനില്‍ ഒഡേസക്ക് മൂന്നാം സ്ഥാനം ലഭിച്ചതായി പഞ്ചായത്ത് പ്രസിഡന്റ് ടി.വി ലക്ഷ്മി വാര്‍ത്താസമ്മേളനത്തില്‍ അറിയിച്ചു. 2.5 ലക്ഷം രൂപയും പ്രശസ്തി പത്രവും അടങ്ങിയ പുരസ്‌കാരം ഡല്‍ഹിയല്‍ നടന്ന ചടങ്ങില്‍ കേന്ദ്ര മന്ത്രിമാരായ നരേന്ദ്ര സിംഗ്‌തോമര്‍, പുരുഷോത്തം രൂപാല എന്നിവരില്‍ നിന്ന് അനില്‍ ഒഡേസ ഏറ്റുവാങ്ങി. വാര്‍ത്താസമ്മേളനത്തില്‍ ടി.വി ലക്ഷ്മി, എം രാമകൃഷ്ണന്‍, അബ്ദുല്‍ ഫത്താഹ്, കെ കരുണാകരന്‍, അനില്‍ ഒഡേസ പങ്കെടുത്തു.