എടപ്പാള്‍: അനധികൃത മണ്ണുകടത്ത് കേസില്‍ കെ.എസ്.ആര്‍.ടി.സി ഡ്രൈവര്‍ പിടിയില്‍. എടപ്പാള്‍ സ്വദേശി മണികണ്ഠനാ(34)ണ് പിടിയിലായത്.
കഴിഞ്ഞ ദിവസം എടപ്പാള്‍ ഹൈസ്‌കൂളിനു സമീപം പൊന്നാനി തഹസില്‍ദാര്‍ എം.എച്ച് ഹരീഷും സംഘവും നടത്തിയ പരിശോധനയ്ക്കിടയിലാണ് ലോറി കസ്റ്റഡിയിലെടുത്തത്. ചോദ്യം ചെയ്യലില്‍ പാസില്ലാതെയാണ് മണ്ണു കടത്തിയിരുന്നതെന്നു കണ്ടെണ്ടത്തി. ഡ്രൈവറെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് കെഎസ്ആര്‍ടിസി ഡ്രൈവറാണെന്നു വ്യക്തമായത്.
വാഹനം ആര്‍ഡിഒയ്ക്ക് കൈമാറി. ഡ്രൈവറെ പൊന്നാനി പൊലിസിന് കൈമാറി കേസെടുത്തു. വെള്ളാഞ്ചേരി കടവില്‍ പുഴയില്‍നിന്നു മണല്‍ നിറച്ച ചാക്കുകളും പിടികൂടി. തവനൂര്‍ ഭാഗത്തുനിന്ന് അനധികൃതമായി പിടികൂടിയ മണല്‍ കലവറയ്ക്ക് കൈമാറിയതായും തഹസില്‍ദാര്‍ അറിയിച്ചു.