ജിദ്ദ: സഊദിയില്‍ നിന്നുള്ള രാജ്യാന്തര വിമാനയാത്രാ ടിക്കറ്റ് നിരക്കുകള്‍ സഊദി എയര്‍ലൈന്‍സ് വെട്ടിക്കുറച്ചു. അതേസമയം ആഭ്യന്തര യാത്രാ നിരക്കുകളില്‍ പത്തു ശതമാനം വര്‍ധനവുമുണ്ട്. ജിദ്ദയില്‍ നിന്നും കൊച്ചിയിലേക്കുള്ള സഊദിയയുടെ ടിക്കറ്റ് നിരക്ക് 1,350 റിയാലുണ്ടായിരുന്ന സ്ഥാനത്ത് ഇപ്പോള്‍ 1,063 റിയാലായി കുറച്ചിരിക്കുകയാണ്. ഇതുപോലെ മറ്റു പല വിദേശ രാജ്യങ്ങളിലേക്കുള്ള രാജ്യാന്തര വിമാന സര്‍വിസുകള്‍ക്കും ടിക്കറ്റ് നിരക്ക് കുറച്ചിട്ടുണ്ട്. ടിക്കറ്റ് നിരക്കുകള്‍ക്കുള്ള നിയന്ത്രണം എടുത്തുകളയുന്ന പദ്ധതിയുടെ രണ്ടാം ഘട്ടമായാണ് ഈ വര്‍ഷം മുതല്‍ ആഭ്യന്തരയാത്രാ നിരക്ക്‌വര്‍ധന നടപ്പാക്കിയത്.
ആഭ്യന്തര ടിക്കറ്റ് നിരക്ക് ഉയര്‍ത്താന്‍ അനുവദിക്കണമെന്ന് സഊദിയിലെ സ്വകാര്യ വിമാന കമ്പനികള്‍ ദീര്‍ഘകാലമായി ആവശ്യപ്പെട്ടിരുന്നു. ഇതേ തുടര്‍ന്നാണ് കഴിഞ്ഞ വര്‍ഷം മുതല്‍ ടിക്കറ്റ് നിരക്ക് ഘട്ടംഘട്ടമായി വര്‍ധിപ്പിക്കുന്നതിന് സഊദി വ്യോമയാന മന്ത്രാലയം അനുമതി നല്‍കിയത്.