കൊച്ചി: മുപ്പത്തി അഞ്ചാമത് കൊച്ചി ഫഌവര്‍ഷോ എറണാകുളത്തപ്പന്‍ ഗ്രൗണ്ടില്‍ പൂച്ചെടി നട്ടുകൊണ്ട്് കൃഷി വകുപ്പ് മന്ത്രി വി.എസ് സുനില്‍കുമാര്‍ ഉദ്ഘാടനം ചെയ്തു.
കൃഷിയിലേക്ക് പുതുതലമുറയെ ആകര്‍ഷിക്കുവാനും കൃഷികൊണ്ട് എന്താണ് മെച്ചമെന്ന ചിന്ത മാറ്റിയെടുക്കുവാനും കൃഷിയുടെ പ്രധാന്യം പോക്കറ്റിലേക്ക് വരുന്ന പണത്തിന്റെ കണക്കിലെടുപ്പിലല്ലെന്നും മനസിലാക്കുവാന്‍ ഇത്തരം സംരംഭങ്ങള്‍ക്ക് കഴിയുമെന്ന് മന്ത്രി വി.എസ് സുനില്‍കുമാര്‍ പറഞ്ഞു. മനുഷ്യന് സ്വസ്ഥതയും സമാധാനവും നല്‍കുവാന്‍ കൃഷിയിലൂടെ സാധ്യമാകുമെന്നും അദ്ദേഹം പറഞ്ഞു. ഹൈബി ഈഡന്‍ എം.എല്‍.എ അധ്യക്ഷത വഹിച്ചു. പ്രൊഫ. കെ.വി തോമസ് എം.പി മുഖ്യുപ്രഭാഷണം നടത്തി. ജില്ലാ കലക്ടര്‍ കെ.മുഹമ്മദ് വൈ. സഫറുള്ള, ജി.സി.ഡി.എ ചെയര്‍മാന്‍ സി.എന്‍ മോഹനന്‍, കൊച്ചിന്‍ കോര്‍പറേഷന്‍ പ്രതിപക്ഷനേതാവ് കെ.ജെ ആന്റണി , കൗണ്‍സിലര്‍ കെ.വി.പി കൃഷ്ണകുമാര്‍, എറണാകുളം ജില്ലാ അഗ്രീഹോട്ടീകള്‍ച്ചറല്‍ സൊസൈറ്റി വൈസ് പ്രസിഡന്റ് കെ.ഐ അബ്ദുല്‍ റഷീദ്, സെക്രട്ടറി ടി.ആര്‍.രജ്ഞിത്ത് എന്നിവര്‍ പ്രസംഗിച്ചു. ജനുവരി 15 വരെ നീണ്ടുനില്‍ക്കുന്ന പുഷ്‌പോല്‍സവത്തില്‍ പുഷ്പാലങ്കാരത്തിന് പ്രത്യേക പവലിയന്‍ ഒരുക്കിയിട്ടുണ്ട്്. 36,000 പൂച്ചെടികളാണ് ഇത്തവണ ഫഌവര്‍ഷോയില്‍ ഒരുക്കിയിരിക്കുന്നത്. തായ്‌ലാന്റ് ഓര്‍ക്കീഡ്, വിവിധതരം റോസ്, ഗ്രാഫ്റ്റ് ചെയ്ത അധീനിയം, പെറ്റിയുണിയ, ഡാലിയ ജെര്‍ബിറ, സാന്‍വിയ, പ്രിന്‍സ് സെറ്റിയ, വൈവിധ്യമാര്‍ന്ന ജമന്തികള്‍ തുടങ്ങിയവയുടെ നീണ്ടനിര തന്നെ പ്രദര്‍ശനത്തിലുണ്ട്. ദിവസവും രാവിലെ 9 മണിമുതല്‍ രാത്രി 9 മണി വരെയാണ് പ്രദര്‍ശനം. മുതിര്‍ന്നവര്‍ക്ക് 50 രൂപയും കുട്ടികള്‍ക്ക് 20 രൂപയുമാണ് ടിക്കറ്റ് നിരക്ക്. അദ്ധ്യാപകര്‍ക്കൊപ്പം സംഘമായി വരുന്ന വിദ്യാര്‍ത്ഥികള്‍ക്ക് പ്രത്യേക സൗജന്യ നിരക്കില്‍ ടിക്കറ്റ് ലഭ്യമാണ്.ഫഌവര്‍ഷോയോടനുബന്ധിച്ച് പുഷ്പറാണിയേയും രാജകുമാരനേയും തിരഞ്ഞെടുക്കും. ഏഴു വയസ്സുമുതല്‍ 14 വയസ്സുവരെയുള്ള കുട്ടികളാണ് മത്സരത്തില്‍ പങ്കെടുക്കുന്നത്. മാല്‍പീജിയ ചെടികള്‍കൊണ്ട് നിര്‍മ്മിച്ചിരിക്കുന്ന ആകര്‍ഷകമായ രൂപത്തില്‍ വളര്‍ത്തിയെടുത്ത റ്റോപിയറി കലാരൂപങ്ങള്‍, തൂക്കിയിട്ടു വളര്‍ത്തുന്ന ഗോളാകൃതിയിലുള്ള ചെടികള്‍, ബോണ്‍സായി ചെടികള്‍, ഔഷധ സസ്യങ്ങള്‍, പാഴ്‌വസ്തുക്കളില്‍ നിന്നുണ്ടാക്കിയ ഉദ്യാനം, ഇന്‍സ്റ്റലേഷന്‍, ജര്‍മ്മനിയില്‍ നിന്നുള്ള വിവിധയിനം ചെമ്പരത്തികള്‍ എന്നിവ മുപ്പത്തി അഞ്ചാമത് ഫഌവര്‍ഷോയുടെ പ്രത്യേകതകളാണ്.