കൂത്തുപറമ്പ്: പൊലിസ് കസ്റ്റഡിയില്‍ മര്‍ദിച്ചെന്നാരോപിച്ച് ആര്‍.എസ്.എസ് പ്രവര്‍ത്തകന്‍ മാഹി ചെമ്പ്രയിലെ സുബീഷ് നല്‍കിയ പരാതിയില്‍ കോടതി മൊഴിയെടുത്തു. മോഹനന്‍ വധക്കേസില്‍ കസ്റ്റഡിയിലെടുത്ത ശേഷം ഡിവൈ.എസ്.പിമാരായ പ്രിന്‍സ് അബ്രഹാം, സദാനന്ദന്‍ എന്നിവര്‍ ഉള്‍പ്പെട്ട പൊലിസ് സംഘം തന്നെ ക്രൂരമായി മര്‍ദിച്ചെന്നാരോപിച്ച് സുബീഷ് നല്‍കിയ പരാതിയില്‍ കൂത്തുപറമ്പ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് വി.കെ സുബ്രഹ്മണ്യന്‍ നമ്പൂതിരിയാണ് മൊഴി രേഖപ്പെടുത്തിയത്. മോഹനനെ കൊലപ്പെടുത്തിയ കേസിലെ പ്രതികള്‍ക്ക് ഒളിവില്‍ താമസിക്കാന്‍ സൗകര്യമൊരുക്കി കൊടുത്തുവെന്നായിരുന്നു സുബീഷിനെതിരെയുള്ള കുറ്റം. ജി പവിത്രന്‍ വധക്കേസില്‍ കൂടി ഉള്‍പ്പെട്ടതിനെ തുടര്‍ന്ന് ഈ കേസിന്റെ റിമാന്‍ഡ് കാലാവധി നീട്ടാനായി ഹാജരാക്കിയപ്പോഴാണ് സുബീഷ് പൊലിസ് മര്‍ദനത്തെകുറിച്ച് കോടതിയില്‍ പരാതിപ്പെട്ടത്. പരാതിയില്‍ സാക്ഷികളെ ഹാജരാക്കി മൊഴിയെടുക്കുന്നതിനായി കേസ് അടുത്ത മാസം മൂന്നിലേക്കു മാറ്റി.