ജറുസലേം: ഇസ്രാഈലില്‍ ട്രക്ക് ഇടിച്ച് കയറിയുണ്ടായ അപകടത്തില്‍ നാലു സൈനികര്‍ കൊല്ലപ്പെട്ടു.

സംഭവത്തില്‍ 15 പേര്‍ക്ക് പരുക്കേല്‍ക്കുകയും ചെയ്തു. ജറുസലേമിലെ സൈനിക ട്രൂപ്പിലേക്കാണ് ട്രക്ക് ഇടിച്ച് കയറിയത്. മരിച്ചവരില്‍ മൂന്നു പേര്‍ വനിതകളാണ്. ജറുസലേമിലെ പഴയ നഗരത്തിലായിരുന്നു സംഭവം.

ട്രക്ക് ഇടിച്ച് കയറ്റിയത് തീവ്രാവാദി ആക്രമണമാണെന്ന് പൊലിസ് വാക്താവ് ഇസ്രാഈല്‍ റേഡിയോയിലൂടെ അറിയിച്ചു.
ട്രക്ക് ഡ്രൈവര്‍ക്ക് നേരെ സൈനികര്‍ വെടിയുതിര്‍ത്തു. വെടിവെപ്പില്‍ തീവ്രവാദി കൊല്ലപ്പെട്ടുവെന്നാണ് മാധ്യമങ്ങള്‍ റിപ്പോര്‍ട്ട് ചെയ്തത്.

നഗര റോഡില്‍ താഴ് ഭാഗത്ത് നിന്ന് വന്ന ട്രക്ക് സൈനികര്‍ക്കിടയിലേക്ക് ഇടിച്ച് കയറുന്നതായാണ് സി.സി.ടി.വി ദൃശ്യങ്ങളിലുള്ളത്.

പത്ത് പേരെ ട്രക്കിനടിയില്‍ നിന്ന് പരുക്കുകളോടെ ആശുപത്രിയില്‍ പ്രവേശിപ്പിച്ചു. മൂന്നു പേരുടെ നില ഗുരുതരമാണെന്ന് ആശുപത്രി വൃത്തങ്ങള്‍ അറിയിച്ചു.

സാമൂഹിക മാധ്യമങ്ങളില്‍ വെളുത്ത നിറമുള്ള ട്രക്കിന്റെ വിന്‍ഡ് ഗ്ലാസ് വെടുയുണ്ടകള്‍ തുളച്ച നിലയിലുള്ള ചിത്രങ്ങള്‍ പോസ്റ്റ് ചെയ്തിട്ടുണ്ട്.

സൈനിക ബസ്സിനായി കാത്ത് നിന്ന സൈനികര്‍ക്കിടയിലേക്കാണ് ട്രക്ക് ഇടിച്ച് കയറ്റിയതെന്ന് ഇസ്രാഈല്‍ പൊലിസ് വാക്താവ് പറഞ്ഞു.

ആക്രമണത്തിന് പിന്നില്‍ ഐഎസ് തീവ്രവാദികളാണെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു പിന്നീട് പ്രതികരിച്ചു.

എന്നാല്‍ കൂടുതല്‍ വിവരങ്ങള്‍ പുറത്ത് വിട്ടിട്ടില്ല. നെതന്യാഹുവും പ്രതിരോധ മന്ത്രി അവിഗ്‌ദോര്‍ ലീബര്‍മാനും സംഭവ സ്ഥലം സന്ദര്‍ശിച്ചു.

തീവ്രവാദി ആക്രമണമാണെന്ന് ഇസ്രാഈല്‍ പറയുന്നുണ്ടെങ്കിലും ഇതുവരെ ആക്രമണത്തെ ആരും ഏറ്റെടുത്തതായി സൂചനയില്ല.