തിരുവനന്തപുരം: ഡ്രൈവിങ് ലൈസന്‍സിനുള്ള കണ്ണ് പരിശോധനാ ഫലം പൂര്‍ണമായും ഓണ്‍ലൈനിലേക്ക് മാറുന്നു. ഇതിനുള്ള നടപടികള്‍ മോട്ടോര്‍ വാഹനവകുപ്പ് ആരംഭിച്ചു. കണ്ണ് പരിശോധനയ്ക്ക് ശേഷം സര്‍ട്ടിഫിക്കറ്റ് ഡോക്ടര്‍ക്ക് തന്നെ അപ്‌ലോഡ് ചെയ്യാന്‍ കഴിയുന്ന തരത്തിലാണ് പുതിയ സംവിധാനം വരുന്നത്. നിലവില്‍ ഡോക്ടറില്‍ നിന്നും ലഭിക്കുന്ന സര്‍ട്ടിഫിക്കറ്റ് അപേക്ഷകനാണ് അപ്‌ലോഡ് ചെയ്യേണ്ടത്. 

ഡ്രൈവിങ് ലൈസന്‍സ് നേരത്തെ തന്നെ ഡിജിറ്റലാക്കിയിരുന്നു. ഈമാസം ഒന്ന് മുതല്‍ വാഹന രജിസ്‌ട്രേഷന്‍ രേഖകളും ഡിജിറ്റലായി മാറിയിരുന്നു. പുതിയ സംവിധാനം വഴി ലൈസന്‍സ് പുതുക്കുന്ന നടപടികള്‍ ഉള്‍പ്പെടെ വേഗത്തിലാക്കാന്‍ കഴിയും. 
ഡോക്ടര്‍ തന്നെ സര്‍ട്ടിഫിക്കറ്റ് നേരിട്ട് അപ്‌ലോഡ് ചെയ്യുന്നതിനാല്‍ ഡോക്ടര്‍മാരുടെ ഉത്തരവാദിത്വം വര്‍ധിക്കും.  

ഡോക്ടറുടെ യോഗ്യത ഉള്‍പ്പെടെ സൈറ്റിലുണ്ടാകും. പരിശോധിക്കാതെ സര്‍ട്ടിഫിക്കറ്റ് നല്‍കിയെന്ന് തെളിഞ്ഞാല്‍ ഡോക്ടര്‍ക്കെതിരേ പരാതിപ്പെടാനും കഴിയും. ഇതുവഴി വ്യജ സര്‍ട്ടിഫിക്കറ്റുകള്‍ ഒഴിവാക്കാന്‍ കഴിയുമെന്ന് ഗതാഗത മന്ത്രി കെ.ബി ഗണേഷ്‌കുമാര്‍ പറഞ്ഞു. ഇടനിലക്കാര്‍ ശേഖരിച്ച് കൊണ്ടുവരുന്ന അപേക്ഷകള്‍ ഒരുമിച്ച് സാക്ഷ്യപ്പെടുത്തി നല്‍കുന്ന ഡോക്ടര്‍മാരുമുണ്ട്. ഇവര്‍ക്കെതിരേ ഡോക്ടര്‍മാര്‍തന്നെ പരാതിപ്പെട്ടിരുന്നു.