2025 ഐപിഎല്ലിൽ കൊൽക്കത്ത നൈറ്റ്‌ റൈഡേഴ്‌സിനെ അജിങ്ക്യ രഹാനെ നയിക്കും. മെഗാ ലേലത്തിൽ 23.75 കോടി രൂപക്ക്‌ കൊൽക്കത്ത സ്വന്തമാക്കിയ വെങ്കിടേഷ് അയ്യരെ കൊൽക്കത്ത ക്യാപ്റ്റനായി നിയമിക്കുമെന്ന വാർത്തകൾ ശക്തമായി നിലന്നിരുന്നു. എന്നാൽ 
ഇതിനെയെല്ലാം മറികടന്നാണ് രഹാനെക്ക്‌ കൊൽക്കത്ത ക്യാപ്റ്റൻ സ്ഥാനം നൽകിയത്. വെങ്കിടേഷ് അയ്യരെയാണ് കൊൽക്കത്ത വൈസ് ക്യാപ്റ്റനായി നിയമിച്ചത്. 

മെഗാ ലേലത്തിൽ 1.50 കോടി രൂപയ്ക്കാണ് രഹാനെയെ കൊൽക്കത്ത സ്വന്തമാക്കിയത്. ഐപിഎല്ലിൽ മറ്റ് പല ടീമുകളെയും ക്യാപ്റ്റൻ എന്ന നിലയിൽ നയിക്കാൻ രഹാനെക്ക് സാധിച്ചിട്ടുണ്ട്. മാത്രമല്ല ഇന്ത്യൻ ടീമിന്റെ നായകനായും രഹാനെ പ്രവർത്തിച്ചിട്ടുണ്ട്.
2018, 2019 സീസണിൽ രാജസ്ഥാൻ റോയൽസിന്റെ ക്യാപ്റ്റനായി രഹാനെ പ്രവർത്തിച്ചിട്ടുണ്ട്. റോയൽസിനെ 24 മത്സരത്തിലാണ് രഹാനെ നയിച്ചിട്ടുള്ളത്. 2017ൽ എംഎസ് ധോണിയുടെ അഭാവത്തിൽ റൈസിങ് പൂനെ സൂപ്പർ ജയന്റ്സിനെയും രഹാനെ നയിച്ചിട്ടുണ്. 2020-21ൽ നടന്ന ബോർഡർ ഗവാസ്കർ ട്രോഫിയിൽ ഇന്ത്യ നേടിയത് രഹാനെയുടെ കീഴിലാണ്. ഓസ്ട്രേലിയക്കെതിരെ 2-1നാണ് ഇന്ത്യ വിജയിച്ചത്.

അടുത്തിടെ അവസാനിച്ച സയ്യിദ് മുഷ്താഖ് അലി ട്രോഫിയിലും തകർപ്പൻ പ്രകടനമായിരുന്നു രഹാനെ നടത്തിയിരുന്നത്. മുംബൈക്ക് വേണ്ടി 58.62 എന്ന മികച്ച ആവറേജിൽ 469 റൺസാണ് രഹാനെ അടിച്ചെടുത്തത്. കഴിഞ്ഞ സീസണിൽ കൊൽക്കത്തയെ ചാമ്പ്യൻമാരാക്കിയ ശ്രേയസ് അയ്യരിനെ കൊൽക്കത്ത ടീമിൽ നിലനിർത്താതെ പോവുകയായിരുന്നു. ഐപിഎൽ മെഗാ ലേലത്തിൽ 26.5 കോടിക്ക് ശ്രേയസിനെ പഞ്ചാബ് കിങ്‌സ് ആണ് അയ്യരെ സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. 

പുതിയ സീസണിലെ ആദ്യ മത്സരത്തിൽ തന്നെ നിലവിലെ ചാമ്പ്യന്മാരായ കൊൽക്കത്ത കളത്തിലിറങ്ങും. കൊൽക്കത്തയുടെ തട്ടകമായ ഈഡൻ ഗാർഡനിൽ നടക്കുന്ന മത്സരത്തിൽ റോയൽ ചലഞ്ചേഴ്‌സ് ബാംഗ്ലൂരാണ് കൊൽക്കത്തയുടെ എതിരാളികൾ. രഹാനെയുടെ കീഴിൽ കൊൽക്കത്ത നാലാം ഐപിഎൽ കിരീടം നേടുമെന്നുതന്നെയാണ് ആരാധകർ ഉറച്ചുവിശ്വസിക്കുന്നത്. 

Kolkata Knight Riders Appointed Ajinkya Rahane The New Captain of IPL 2025