ബോവിക്കാനം: ഇരിയണിയില്‍ എം.എസ്.എഫ്, കെ.എസ്.യു പ്രവര്‍ത്തകരായ വിദ്യാര്‍ഥികള്‍ക്കു മര്‍ദനമേറ്റു. ഇരിയണി ഗവ. വെക്കേഷണല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികളായ ഹൈദരലി, അറഫാത്ത്, ഫാരിസ്, അജ്മല്‍ എന്നിവര്‍ക്കാണു മര്‍ദനമേറ്റത്. ഇന്നലെ വൈകുന്നേരം നാലോടെ സ്‌കൂള്‍ പരിസരത്തു വച്ച് എസ്.എഫ്.ഐ-ഡി.വൈ.എഫ്.ഐ പ്രവര്‍ത്തകര്‍ മര്‍ദിച്ചുവെന്നാണ് ആരോപണം. കെ.എസ്.യുവിന്റെ നേതൃത്വത്തിലുള്ള വിദ്യാഭ്യാസ ബന്ദിനെച്ചൊല്ലി രാവിലെ സ്‌കൂളില്‍ വിദ്യാര്‍ഥികള്‍ തമ്മില്‍ വാക്കേറ്റം നടന്നിരുന്നു. ഇതിന്റെ തുടര്‍ച്ചയെന്നോണം വൈകിട്ട് സ്‌കൂള്‍ വിട്ടു വരുകയായിരുന്ന വിദ്യാര്‍ഥികളെ പുറമെ നിന്നും മാരകായുധങ്ങളുമായെത്തിയ ഡി.വൈ.എഫ്.ഐ പ്രവര്‍ത്തകര്‍ അക്രമിക്കുകയായിരുന്നുവെന്ന് എം.എസ്.എഫ് നേതാക്കള്‍ ആരോപിച്ചു. പരുക്കേറ്റവരെ കാസര്‍കോട് സ്വകാര്യാശുപത്രിയില്‍ പ്രവേശിപ്പിച്ചു.