കരുനാഗപ്പള്ളി: റെയില്‍വേ സ്റ്റേഷന് സമീപം പാര്‍ക്ക് ചെയ്തിരുന്ന വാഹനങ്ങള്‍ക്ക് തീപിടിച്ചു. ഇന്നു ഉച്ചതിരിഞ്ഞ് 2.45നായിരുന്നു അപകടം. റെയില്‍വേ സ്റ്റേഷന്റെ തെക്കുഭാഗത്തായി പാര്‍ക്ക് ചെയ്തിരുന്ന വാഹനങ്ങള്‍ക്കാണ് തീപിടിച്ചത്. 15ലധികം ബൈക്കുകളും ഒരു കാറും അപകടത്തില്‍ പൂര്‍ണമായും കത്തിയമര്‍ന്നു

. സ്റ്റേഷനിലേക്കെത്തുന്ന സ്ഥിരം യാത്രികരുടെ വാഹനങ്ങളാണ് കത്തി നശിച്ചവയില്‍ ഏറെയും. അപകടത്തെ തുടര്‍ന്ന് ഉഗ്രശബ്ദത്തോടെ വാഹനങ്ങള്‍ പൊട്ടിത്തെറിച്ചതോടെ സമീപത്തു നിന്നവര്‍ ഓടിമാറുകയായിരുന്നു. തീകെടുത്തുവാനുള്ള ശ്രമം പരാജയപ്പെട്ടതോടെ സ്റ്റേഷന്‍മാസ്റ്റര്‍ ഫയര്‍ഫോഴ്‌സില്‍ വിവരം അറിയിച്ചു.

കരുനാഗപ്പള്ളി ഫയര്‍ ഫോഴ്‌സ് യൂനിറ്റ് എത്തി പിന്നീട് തീ നിയന്ത്രണ വിധേയമാക്കി. നിലത്തെ പുല്ലിനു തീപിടിച്ചതാണ് അപകടകാരണമെന്ന്് സ്‌റ്റേഷന്‍ ഓഫീസര്‍ വി.സി വിശ്വനാഥ് വ്യക്തമാക്കി. രക്ഷാപ്രവര്‍ത്തനങ്ങള്‍ക്ക് ലീഡിങ് ഫയര്‍മാന്‍ അബ്ദുല്‍സമദ്, ഫയര്‍മാന്‍മാരായ രാജേഷ്,മഹേഷ്, സുഭാഷ് നേതൃത്വം നല്‍കി.