നെടുമങ്ങാട്: ക്രഷര്‍ യൂനിറ്റിലേയ്ക്ക് ലോഡെടുക്കാന്‍ പോയ ലോറി തടയാന്‍ ശ്രമിച്ചയാള്‍ ലോറിയ്ക്കടിയില്‍പെട്ട് മരിച്ചു. വേട്ടമ്പള്ളി പത്രംകോട് തടത്തരികത്ത് വീട്ടില്‍ ഷിബു (42) ആണ് മരിച്ചത്.
വേങ്കവിള വേട്ടമ്പള്ളി റോഡില്‍ കോളനി ജങ്ഷന് സമീപം ഇന്നലെ രാവിലെ പത്തിനായിരുന്നു അപകടം. പത്ത് മണി കഴിയാതെ ലോഡെടുക്കാന്‍ ലോറികള്‍ക്ക് ക്രഷര്‍ യൂനിറ്റിലേക്ക് പോകാന്‍ പാടില്ലെന്ന് പറഞ്ഞ് ഷിബു വണ്ടിയുടെ മുന്നിലേയ്ക്ക് എടുത്തു ചാടി തടയാന്‍ ശ്രമിക്കുന്നതിനിടെ കാലിടറി ലോറിയുടെ അടിയില്‍ വീഴുകയായിരുന്നു.
പിന്‍ചക്രം തലയിലൂടെ കയറിയിറങ്ങി. സംഭവ സ്ഥലത്തു തന്നെ മരിച്ചു. നെടുമങ്ങാട് പൊലിസെത്തിയാണ് മൃതദേഹം ആശുപത്രിയിലെത്തിച്ചത്. ലോറിയുടെ ഡ്രൈവറെ പൊലിസ് കസ്റ്റഡിയിലെടുത്തു.
കൃഷ്ണന്‍ആചാരിയുടെയും ഓമനയുടെയും മകനാണ് ഷിബു. അവിവാഹിതനാണ്. അജി, പരേതനായ ബിജുകുമാര്‍ എന്നിവര്‍ സഹോദരങ്ങളാണ്.