ന്യൂഡല്‍ഹി: പുറത്താക്കപ്പെട്ട ബി.സി.സി.ഐ ഭാരവാഹികള്‍ക്ക് സംസ്ഥാനത്തെ പ്രതിനിധീകരിച്ച് ബി.സി.സി.ഐ യോഗങ്ങളിലും ബി.സി.സി.ഐയെ പ്രതിനിധീകരിച്ച്  ഐ.സി.സി യോഗങ്ങളിലും പങ്കെടുക്കാന്‍ സാധിക്കില്ലെന്ന് ലോധ കമ്മിറ്റി. നിര്‍ദേശങ്ങള്‍ വിശദീകരക്കവേയാണ് ജസ്റ്റിസ് ലോധ ഇപ്രകാരം വ്യക്തമാക്കിയത്. അതേസമയം ഇവര്‍ക്ക് ക്രിക്കറ്റ് ഭരണത്തില്‍ യാതൊരു വിധ ഭാരവാഹിത്വവും ഉണ്ടാവില്ലെന്നും കമ്മിറ്റി വ്യക്തമാക്കി. നേരത്തെ പുറത്താക്കപ്പെട്ട ഭാരവാഹികള്‍ സംസ്ഥാന അസോസിയേഷനുകളില്‍ അംഗത്വം നേടുമെന്നും ഇവര്‍ അതത് അസോസിയേഷനുകളെ പ്രതിനിധീകരിച്ച് ബി.സി.സി.ഐ യോഗങ്ങളിലും പങ്കെടുക്കുമെന്ന് അഭ്യൂഹമുണ്ടായിരുന്നു. ഈ സാഹചര്യത്തിലാണ് പഴുതുകളടയ്ക്കാന്‍ ലോധ കമ്മിറ്റി തീരുമാനിച്ചത്. ഇതോടെ പുറത്താക്കപ്പെട്ട ബി.സി.സി.ഐ സെക്രട്ടറി  അജയ് ഷിര്‍ക്കെ മുംബൈ ക്രിക്കറ്റ് അസോസിയേഷന്റെ പ്രതിനിധിയായി നിയമിച്ച നടപടിക്ക് സാധുതയില്ലാതാവും.