ന്യൂഡല്‍ഹി: ഉത്തരേന്ത്യയില്‍ അതിശൈത്യം പിടിമുറുക്കുന്നു. കഴിഞ്ഞ ഏതാനും ആഴ്ചകളിലായി ഉത്തരേന്ത്യയിലെ വിവിധ സംസ്ഥാനങ്ങള്‍ അതിശൈത്യത്താല്‍ വിറങ്ങലിക്കുകയാണ്. ശൈത്യം ഇവിടുത്തെ ജനങ്ങളുടെ നിത്യ ജീവിതത്തെ പ്രതികൂലമായി ബാധിക്കുന്നത് തുടരുകയാണ്. ഗ്രാമങ്ങളിലെല്ലാം പുരുഷന്‍മാര്‍ക്കും യുവാക്കള്‍ക്കും ജോലിക്ക് പോകാന്‍ സാധിക്കുന്നില്ല. എല്ലായിടത്തും ജനങ്ങള്‍ രാവിലെ മുതല്‍ തീകായുന്ന കാഴ്ചയാണ് കാണാന്‍ കഴിയുന്നത്.

ഇവിടങ്ങളിലെ റോഡ്-വ്യോമ-റെയില്‍ ഗതാഗതവും താറുമാറാകുന്നത് നിത്യ സംഭവമാണ്. ഇന്ന് ഡല്‍ഹിയില്‍ 25 ട്രെയിനുകള്‍ വൈകിയാണോടുന്നത്. എട്ട് ട്രെയിനുകള്‍ സമയക്രമം മാറ്റുകയും രണ്ട് ട്രെയിനുകള്‍ റദ്ദാക്കുകയും ചെയ്തിട്ടുണ്ട്.

അതിശൈത്യം മൂലം ഡല്‍ഹിയിലെ സര്‍ക്കാര്‍ സ്‌കൂളുകള്‍ക്കും അവധി നല്‍കിയിരിക്കുകയാണ്. കെ.ജി മുതല്‍ 5ാം ക്ലാസ് വരെയുള്ളവരുടെ ശൈത്യകാല അവധി ജനുവരി 19 വരെ നീട്ടി. ഹമാചല്‍ പ്രദേശിലെ ഷിംലയില്‍ റോഡില്‍ മഞ്ഞു വീഴുന്നത് മൂലം ഗതാഗതം സ്തംഭിച്ചിരിക്കുകയാണ്.