ഫറോക്ക് : ചെറുവണ്ണൂരില്‍ കോര്‍പ്പറേഷന് കീഴിലുളള ചില്‍ഡ്രന്‍സ് പാര്‍ക്കും പരിസരവും സ്വകാര്യ ബസുകള്‍ പാര്‍ക്കിങ് കേന്ദ്രമാക്കുന്നു. ബസുകള്‍ ഇവിടെ നിര്‍ത്തിയിടുന്നത് മറ്റുവാഹന യാത്രികര്‍ക്കും പൊതുജനങ്ങള്‍ക്കും ദുരിതമാവുകയാണ്.
കുട്ടികളുടെ പാര്‍ക്കിനു മുന്‍പിലും മല്ലിക തിയേറ്ററിന് മുന്‍വശത്തെ ഒഴിഞ്ഞ പാതയോരത്തുമാണ് ബസുകള്‍ താവളമാക്കുന്നത്. ബസുകള്‍ ഇല്ലാത്ത സമയത്ത് ചരക്കുലോറികള്‍ ഇവിടെ കൊണ്ടുവന്നു പാര്‍ക്ക് ചെയ്യുന്നു. വാഹനങ്ങളുടെ അറ്റകുറ്റപ്പണികളും ഡ്രൈവിങ് പരിശീലനം വരെ ഇവിടെയാണ് നടക്കുന്നത്.
ബസുകളും ലോറികളും സ്ഥിരമായി ഇവിടെ നിര്‍ത്തിയിടുന്നതിനാല്‍ ഫറോക്ക് പാലത്തിലേക്കും പാലത്തിനടയിലൂടെയുളള റോഡിലേക്കുളള വാഹന സഞ്ചാരത്തിന് തടസ്സമാവുകായാണ്. കുട്ടികളുടെ പാര്‍ക്കിലേക്കുളള കവാടം മൂടിയാണ് വാഹനങ്ങള്‍ നിര്‍ത്തിയിടുന്നത്. വാഹന പാര്‍ക്കിങിന്റെ മറവില്‍ സാമുഹ്യവിരുദ്ധരും ഇവിടെ തമ്പടിക്കുന്നു. നേരം ഇരുട്ടിയാല്‍ ദൂരെ ദിക്കുകളില്‍ നിന്നു പോലും ചെറുസംഘങ്ങള്‍ ഇവിടെയെത്തുന്നതായി പരിസരവാസികള്‍ പരാതിപ്പെടുന്നു. അനധികൃത വാഹന പാര്‍ക്കിങും സാമുഹ്യവിരുദ്ധരുടെ വിളയാട്ടത്തിനും ഉടന്‍ അറുതി വരുത്തണമെന്ന ആവശ്യം ശക്തമാവുകയാണ്.