മുട്ടില്‍: സംസ്ഥാനത്താദ്യമായി പൊതുജന സഹകരണത്തോടെ പഞ്ചായത്തിന്റെ ആസ്തി നിര്‍ണയത്തിനൊരുങ്ങി മുട്ടില്‍ പഞ്ചായത്ത്. പൊതു ആസ്തികള്‍ നഷ്ടപ്പെടാതെയും നഷ്ടപ്പെട്ടത് തിരിച്ചെടുത്തും ഭാവി തലമുറക്കായി സംരക്ഷിച്ച് കൈമാറുകയെന്നതാണ് പദ്ധതിയുടെ ലക്ഷ്യം.
അയല്‍സഭ, വാര്‍ഡ് വികസന സമിതി, ഗ്രാമസഭ മുന്‍ പ്രതിനിധികള്‍, രാഷ്ട്രീയക്കാര്‍ സന്നദ്ധ സംഘടനകള്‍ എന്നിവരുടെ അറിവും കഴിവും പ്രയോജനപ്പെടുത്തിയാണ് വിവര ശേഖരണം നടക്കുക. നിലവില്‍ പഞ്ചായത്തിലെ റോഡുകള്‍, നടപ്പാത, നടവഴി, പാലം, പൊതു കിണറുകള്‍, കുഴല്‍ക്കിണറുകള്‍, കുടിവെള്ള പദ്ധതികള്‍, പൊതു സ്ഥലങ്ങള്‍, പുറമ്പോക്കുകള്‍, ശ്മശാനങ്ങള്‍ എന്നിവയെ സംബന്ധിച്ച കൃത്യമായ രജിസ്റ്ററോ ഡിജിറ്റല്‍ രേഖകളോ ഇല്ല.
ഇതു കാരണം പല പഞ്ചായത്ത് ആസ്തികളും നഷ്ടപ്പെടുകയും വ്യക്തികള്‍ കൈവശപ്പെടുത്തുകയും ചെയ്തിട്ടുണ്ട്. കൂടാതെ ഇത്തരം കേസുകളില്‍ കോടതി വ്യവഹാരത്തിന് പണം നഷ്ടപ്പെടുകയും ചെയ്യുന്ന സാഹചര്യത്തിലാണ് ആസ്തി നിര്‍ണം നടത്തുന്നത്. ഇതിന്റെ ഭാഗമായി സര്‍വേ നടത്തി വാര്‍ഡുതലത്തില്‍ ലഭ്യമായത് ക്രോഡീകരിച്ച് ഈമാസം 29നകം ഗ്രാമസഭയുടെ അംഗീകാരം നേടണം.
തുടര്‍ന്ന് ഗ്രാമസഭയുടെ റിപ്പോര്‍ട്ട് നിലവിലെ ആസ്തി രജിസ്റ്ററുമായി ഒത്തുനോക്കി അപാകതകള്‍ കണ്ടെത്തി ഭരണ സമിതിയുടെ അംഗീകരാത്തോടെ ഗസറ്റ് നോട്ടിഫിക്കേഷന്‍ ചെയ്യും.
ഇതു സംബന്ധിച്ചുള്ള പരാതികള്‍ വിവിധ സര്‍ക്കാര്‍ വകുപ്പുകളുമായി ചര്‍ച്ച ചെയ്ത് തര്‍ക്കം പരിഹരിക്കുകയും അന്തിമ രൂപം നല്‍കി നോട്ടിഫൈ ചെയ്ത് രജിസ്റ്റര്‍ ആധുനിക രീതിയിലാക്കാനാണ് അധികൃതര്‍ പദ്ധതിയിടുന്നത്. കൂടാതെ ആസ്തി സംരക്ഷണത്തിന് നടപടിയെടുക്കുകയും എല്ലാ ആറു മാസത്തിലും അയല്‍ സഭ ആസ്തികളുടെ അവസ്ഥ പരിശോധിക്കുകയും ചെയ്യും.
പൊതുജന സഹകരണത്തോടെ മാലിന്യ സംസ്‌കരണത്തിനും പഞ്ചായത്ത് പദ്ധതി ആസൂത്രണം ചെയ്യുന്നുണ്ട്. വീടുകളിലെ മാലിന്യം ഒരു നിശ്ചിത ദിവസം എല്ലാവരില്‍ നിന്നും ഗ്രീന്‍ വളണ്ടിയര്‍മാരെ ഉപയോഗിച്ച ശേഖരിച്ച് ടെന്‍ഡര്‍ സ്വീകരിച്ച ഏജന്‍സിക്ക് കൈമാറുന്നതാണ് പദ്ധതി.