പയ്യാവൂര്‍: രൂക്ഷമായ കുടിവെള്ള ക്ഷാമം നേരിടുന്ന കാഞ്ഞിരക്കൊല്ലി കുരങ്ങന്‍മല നിവാസികള്‍ പ്രക്ഷോഭത്തിലേക്ക്. ഒന്നര പതിറ്റാണ്ടായി പ്രദേശത്തുകാര്‍ അധികൃതര്‍ക്ക് നിവേദനങ്ങള്‍ നല്‍കുകയും സമരപരിപാടികള്‍ നടത്തുകയും ചെയ്‌തെങ്കിലും നടപടിയുണ്ടായില്ല. കഴിഞ്ഞ വര്‍ഷം വെള്ളക്ഷാമം ഉണ്ടായപ്പോള്‍ കലക്ടര്‍ക്കു നല്‍കിയ പരാതിയില്‍ റവന്യൂ വകുപ്പിന്റെ സഹായത്തോടെ വാഹനത്തില്‍ കുടിവെള്ളം എത്തിച്ചിരുന്നു. ഈ വര്‍ഷം ആരംഭത്തില്‍ തന്നെ കുടിവെള്ള ക്ഷാമം രൂക്ഷമായി. ഈ അവസ്ഥ തുടരുകയാണെങ്കില്‍ കുടിവെള്ളം കിട്ടാതെ പ്രദേശവാസികള്‍ ദുരിതത്തിലാവുമെന്നും ഇതിനെതിരെ പ്രക്ഷോഭങ്ങള്‍ ആരംഭിക്കുമെന്നും പ്രാദേശിക വികസന സമിതി പ്രസിഡന്റ് ഷാജി പാട്ടശേരി അറിയിച്ചു.