പയ്യന്നൂര്‍: ജൈവവൈവിധ്യങ്ങളുടെ കലവറയായ ഏച്ചിലാംവയല്‍ കുന്നില്‍ തീപിടിത്തം. ഇന്നലെ ഉച്ചയോടെയാണ് കുന്നിന്‍ മുകളില്‍ തീപിടിച്ചത്. കശുമാവുകള്‍, നിരവധി മറ്റ് മരങ്ങള്‍, കുറ്റിചെടികള്‍ എന്നിവയെല്ലാം കത്തി നശിച്ചു.
കുന്നില്‍ നിന്നു പുക ഉയരുന്നത് കണ്ട പരിസരവാസികള്‍ എത്തിയപ്പോഴാണ് തീ പടരുന്നത് കണ്ടത്. ഉടന്‍ ഫയര്‍ഫോഴ്‌സില്‍ വിവരമറിയിച്ചു. ഫയര്‍ഫോഴ്‌സും നാട്ടുകാരും മണിക്കൂറുകളോളം നീണ്ട പരിശ്രമത്തിന് ശേഷമാണ് തീയണച്ചത്. കുന്നിന് മുകളിലേക്ക് ഫയര്‍ഫോഴ്‌സ് വാഹനത്തിന് എത്തിച്ചേരാന്‍ പ്രയാസം സൃഷ്ടിച്ചത് തീ പടരാന്‍ ഇടയാക്കി. മൂന്നിടങ്ങളിലായി പത്ത് ഏക്കറോളം പ്രദേശത്ത് തീ പടര്‍ന്നിരുന്നു. വാഹനം എത്താന്‍ കഴിയാത്ത പ്രദേശത്ത് തല്ലിക്കെടുത്തിയാണ് തീയണച്ചത്.
അപൂര്‍വമായ ചെറുസസ്യങ്ങള്‍ നിറഞ്ഞ പ്രദേശമാണ് ഏച്ചിലാംവയല്‍ കുന്ന്. വേനലില്‍ സമീപത്തെ കുടുംബങ്ങള്‍ക്ക് കുടിവെള്ളം പ്രദാനം ചെയ്യുന്ന കുന്നില്‍ നിന്നും നേരത്തെ വ്യാപകമായി മണ്ണെടുത്തിരുന്നു. വര്‍ഷകാലത്ത് ഈ ഭാഗം ഇടിഞ്ഞ് വീണ് കുന്ന് നേര്‍ത്തു വരികയാണ്.
സാമൂഹ്യ വിരുദ്ധര്‍ കുന്നിന്‍ മുകളില്‍ താവളമാക്കുന്നതായി ആരോപണവുമുണ്ട്.