കണ്ണൂര്‍: കാറിനു സൈഡ് നല്‍കിയില്ലെന്ന് ആരോപിച്ച് ഒരുസംഘം കെ.എസ്.ആര്‍.ടി.സി ബസ് തടഞ്ഞ് ഡ്രൈവറെ മര്‍ദിച്ചു. വാണിയപ്പാറ-കണ്ണൂര്‍- നെടുങ്കണ്ടം റൂട്ടില്‍ സര്‍വിസ് നടത്തുന്ന ബസിലെ ഡ്രൈവര്‍ തലശ്ശേരി സ്വദേശി ഷിജിലിനാണു മര്‍ദനമേറ്റത്. ചൊവ്വാഴ്ച രാത്രി 7.30ഓടെ മേലെചൊവ്വയ്ക്കും താഴെചൊവ്വയ്ക്കും ഇടയിലായിരുന്നു സംഭവം. പള്ളിക്കുന്ന് സ്വദേശിയായ ശ്രീകുമാറിന്റെ നേതൃത്വത്തിലുള്ള സംഘം ബസിനു കുറുകെ കാര്‍ നിര്‍ത്തി ഡ്രൈവറുടെ ഡോറിന്റെ ചില്ല് തകര്‍ത്ത് ഷിജിലിനെ പുറത്തേക്കു വലിച്ചിട്ടു മര്‍ദിച്ചുവെന്നാണു പരാതി. പരുക്കേറ്റ ഷിജില്‍ ജില്ലാആശുപത്രിയില്‍ ചികിത്സതേടി. കെ.എസ്.ആര്‍.ടി.സി കണ്ണൂര്‍ ഡിപ്പോ ഇന്‍സ്‌പെക്ടറുടെ പരാതിയില്‍ ടൗണ്‍പൊലിസ് കേസെടുത്തു.