കണ്ണൂര്‍: സംസ്ഥാന സ്‌കൂള്‍ കലോത്സവത്തില്‍ ഹൈസ്‌കൂള്‍, ഹയര്‍സെക്കന്‍ഡറി വിഭാഗം നാടകങ്ങളിലെ മികച്ച നടനും നടിക്കും ഭരത് പി.ജെ ആന്റണി മെമ്മോറിയല്‍ അവാര്‍ഡ് നല്‍കും. പി.ജെ ആന്റണി മെമ്മോറിയല്‍ ഫൗണ്ടേഷന്‍ കൊച്ചി, പാര്‍ട്ട് വണ്‍ നോട്ട് വണ്‍ ഫിലിംസ് തൃശൂര്‍, ബിന്നി ഇമ്മട്ടി ഫിലിംസ് തൃശൂര്‍, ഫിലിം ചേമ്പര്‍, കണ്ണൂര്‍ പ്രസ് ക്ലബ് ആന്‍ഡ് മീഡിയ സെന്റര്‍ തുടങ്ങിയവരുമായി സഹകരിച്ചാണ് അവാര്‍ഡ് നല്‍കുക. 1000 രൂപയുടെ നാടക പുസ്തകങ്ങളും മണികണ്ഠന്‍ കിഴക്കൂട്ട് രൂപകല്‍പ്പന ചെയ്ത ശില്‍പവും പി.ജെ ആന്റണി പ്രശസ്തി പത്രവും അടങ്ങുന്നതാണ് അവാര്‍ഡ്. നാടക മത്സരം കഴിഞ്ഞ അടുത്ത ദിവസം രാവിലെ 11നു കലോത്സവ മീഡിയ സെന്ററില്‍ വച്ച് അവാര്‍ഡ് സമ്മാനിക്കും. വാര്‍ത്താസമ്മേളനത്തില്‍ ചാക്കോ ഡി അന്തിക്കാട്, ഇ.എം ഷാഫി, കെ.ടി ശശി, ജമാല്‍ കണ്ണൂര്‍ സിറ്റി പങ്കെടുത്തു. പ്രസ് ക്ലബ് പ്രസിഡന്റ് കെ.ടി ശശി പി.ജെ ആന്‍ണി സ്മാരക പ്രശസ്തി പത്രം പ്രകാശനം ചെയ്തു.