കോവളം: വിഴിഞ്ഞത്ത് കടല്‍കാഴ്ചകള്‍ കാണാനും സൂര്യാസ്തമയം ദര്‍ശിക്കാനുമെത്തുന്നവരെ സ്വാഗതം ചെയ്യുന്നത് അസഹ്യമായ ദുര്‍ഗന്ധം. ഇവിടെ കടല്‍തീരം അറവുശാലക്കാരുടേതടക്കമുള്ള  മാലിന്യ നിക്ഷേപകേന്ദ്രമായി മാറിയതാണ് വിഴിഞ്ഞം ബൊള്ളാര്‍ഡ് പുള്‍ടെസ്റ്റിങ് കേന്ദ്രവും പുതിയ വാര്‍ഫും കാണാനെത്തുന്ന സഞ്ചാരികളെ ദുരിത്തിലാക്കിയിരിക്കുന്നത്. ദുര്‍ഗന്ധം സഹിക്കവയ്യാതെ മൂക്ക് പൊത്തിയാണ് സഞ്ചാരികള്‍ ഇവിടെ നില്‍ക്കുന്നത്. കരയും ജലാശയങ്ങളും മലിനമാക്കി മാലിന്യം വലിച്ചെറിയുന്ന സംഘങ്ങള്‍ കടലിനെയും വെറുതെ വിടില്ലെന്നതിനുദാഹരണമാണ് വിഴിഞ്ഞം തുറമുഖത്തിന് സമീപത്തെ ഈ മനോഹര സ്ഥലം.
രാത്രി കാലങ്ങളിലും തിരക്കൊഴിഞ്ഞ സമയങ്ങളിലും ഓട്ടോകളിലും പിക്അപ് വാനുകളിലും ഇരുചക്ര വാഹനങ്ങളിലും ചാക്കുകളിലാക്കി കൊണ്ടുവരുന്ന മാംസാവശിഷ്ടങ്ങളും പ്ലാസ്റ്റിക്ക് അടക്കമുള്ള ഭക്ഷണ വേസ്റ്റും പുള്‍ടെസ്റ്റിംഗ് കേന്ദ്രത്തിന് മുന്നില്‍ നിന്ന് കടലിലേക്ക് വലിച്ചെറിയുകയാണ് പതിവ്. ഇങ്ങനെ വലിച്ചെറിയുന്നതിനിടയില്‍ പാറക്കൂട്ടങ്ങള്‍ക്കിടയില്‍ കുടുങ്ങുന്ന മാലിന്യങ്ങള്‍ കാക്കകളും പരുന്തിന്‍ കൂട്ടങ്ങളും കൊത്തിവലിച്ച് തുറമുഖ വാര്‍ഫിലും സമീപത്തെ പള്ളി അങ്കണത്തിലും പരിസര പ്രദേശങ്ങളിലും കൊണ്ടിടുന്നത് പ്രദേശവാസികളെയും ബുദ്ധിമുട്ടിലാക്കിയിരിക്കുകയാണ്. ആടുമാടുകളുടെയും കോഴികളുടെയും മാംസാവശിഷ്ടങ്ങളില്‍ നിന്ന് രൂക്ഷമായ ദുര്‍ഗന്ധമാണ് ഉയരുന്നത്. കപ്പലുകളുടെ ശേഷി പരിശോധനക്കുള്ള ബൊള്ളാര്‍ഡ് പുള്‍ടെസ്റ്റിംഗ് കേന്ദ്രത്തിലും പാര്‍ക്കിലും ഇരുന്ന് കാഴ്ചകള്‍ കാണാന്‍ സ്‌കൂള്‍ കുട്ടികള്‍ ഉള്‍പ്പെടെ ദൂരെ സ്ഥലങ്ങളില്‍ നിന്ന് പോലും ദിനംപ്രതി നൂറ് കണക്കിന് സഞ്ചാരികള്‍ വന്നുപോകുന്ന ഇടത്താണ് ഈ ഗതി കേട്.
തുറമുഖത്തിന്റെ പുതിയ വാര്‍ഫും പരിസരവും പക്ഷികള്‍ കൊത്തി വലിച്ചു കൊണ്ടിടുന്ന മാംസാവശിഷ്ടങ്ങളില്‍ പറ്റി പിടിക്കാന്‍ കൂട്ടമായി എത്തുന്ന ഈച്ചകളും ചെറുപ്രണികളും പരിസരം കൈയ്യടക്കിയ അവസ്ഥയിലാണ്. സുരക്ഷാ സേനകളായ തീരസംരക്ഷണ സേനയും തീരദേശ പൊലിസും മറൈന്‍ എന്‍ഫോഴ്‌സ്‌മെന്റിന്റെതുള്‍പ്പടെ തമ്പടിച്ചിരിക്കുന്നതിന് അന്‍പത് മീറ്റര്‍ മാറിയും കസ്റ്റംസിന്റെ  സിഗ്‌നല്‍ സ്റ്റേഷന്റെയും തൊട്ടു മുന്നിലുമാണ് കടലിനെയും മലിനമാക്കുന്ന ഈ  മാലിന്യ നിക്ഷേപ കേന്ദ്രം. കടലിനെ മലിനമാക്കുന്നത് തടയാന്‍ അടിയന്തിര നടപടി സ്വീകരിക്കാന്‍ അധികൃതര്‍ തയാറാകണമെന്നാണ് നാട്ടുകാര്‍ ആവശ്യപ്പെടുന്നത്.