തൊടുപുഴ: എല്‍.ഐ.സി ഏജന്റിനെ എല്‍ഐസി ഓഫീസില്‍ വച്ച് കൈയ്യേറ്റം ചെയ്യുകയും അസഭ്യം പറയുകയും ചെയ്ത ജീവനക്കാരന്റെ പേരില്‍ നടപടി സ്വീകരിക്കണമെന്നാവശ്യപ്പെട്ട് എല്‍ഐസി ഏജന്റുമാര്‍ തൊടുപുഴയിലുള്ള എല്‍ഐസി ബ്രാഞ്ച് ഓഫീസിനുമുന്നില്‍ ധര്‍ണ്ണ നടത്തി. എല്‍ഐസി ഏജന്റ്‌സ് ഫെഡറേഷന്‍ ദേശീയ വൈസ് പ്രസിഡന്റ് പി എന്‍ രാജീവന്‍ ധര്‍ണ്ണ ഉദ്ഘാടനം ചെയ്തു.
ഫെഡറേഷന്‍ ബ്രാഞ്ച് പ്രസിഡന്റ് മനോജ് തോമസ്, സെക്രട്ടറി ജോര്‍ജ്ജ് അഗസ്റ്റിന്‍, സൈജന്‍ സ്റ്റീഫന്‍, ജോസഫ് കുര്യന്‍, സി സി അ നില്‍കുമാര്‍ തുടങ്ങിയവര്‍ പ്രസംഗിച്ചു. തിങ്കളാഴ്ച ഉച്ചകഴിഞ്ഞ് തട്ടക്കുഴ സ്വദേശിയായ എല്‍ഐസി ഏജന്റ് ജോമിയെയാണ് ഓഫീസ് ജീവനക്കാരനായ ഷാജഹാന്‍ ആക്രമിച്ചത്. മുടങ്ങിപ്പോയ ഒരു പോളിസി പുതുക്കുന്നതിന് വിദേശ മലയാളിയായ ഒരു പോളിസി ഉടമയുമായി ജോമി രാവിലെ എല്‍ഐസി ഓഫീസിലെത്തിയതാണ്. ഇതിന് ആവശ്യമായ രേഖകള്‍ ചോദിക്കുകയും എല്ലാം ലഭിച്ചുവെന്നും ജീവനക്കാര്‍ അറിയിച്ചതിനെ തുടര്‍ന്ന് പോളിസി ഉടമ മടങ്ങുകയും ചെയ്തു. ഉച്ചകഴിഞ്ഞപ്പോള്‍ പോളിസി പുതുക്കുന്നതിന് വേറെയും രേഖകള്‍ ആവശ്യപ്പെട്ടു. രാവിലെ രേഖകള്‍ എല്ലാം ലഭിച്ചു എന്നറിയിച്ച ജീവനക്കാരനോട് ഇതേക്കുറിച്ച് ജോമി ചോദിക്കുമ്പോള്‍ ക്ഷുഭിതനായെത്തിയ ഷാജഹാന്‍ കൈയ്യേറ്റം ചെയ്തുവെന്നാണ് പരാതി. ഏതാനും നാളുകളായി ചില ജീവനക്കാര്‍ പോളിസി ഉടമകളോടും ഏജന്റുമാ രോടും മോശമായി പെരുമാറുന്നതായും ആക്ഷേപം ഉണ്ട്.