കാസര്‍കോട്: രണ്ടരലക്ഷം രൂപയുമായി മുങ്ങിയ ആളെ അന്വേഷിച്ച് യുവതി കാസര്‍കോട് ടൗണ്‍ പൊലിസ് സ്റ്റേഷനിലെത്തി. മഹാരാഷ്ട്ര ഉല്ലാസ് നഗര്‍ സ്വദേശിനിയും ഡാന്‍സ് ബാറില്‍ നര്‍ത്തകിയുമായ യുവതിയാണ് തന്റ പണവുമായി മുങ്ങിയ കാസര്‍കോട് സ്വദേശിയായ അമ്പതുകാരനെ കണ്ടെത്താന്‍ സഹായം തേടിയെത്തിയത്. ഇയാളെ അന്വേഷിച്ച് ഇന്നലെ രാവിലെയാണ് യുവതി കാസര്‍കോട് ടൗണ്‍ സ്‌റ്റേഷനിലെത്തി പരാതി നല്‍കിയത്.
കാസര്‍കോട് സ്വദേശിയായ അമ്പതുകാരനുമായി രണ്ടുവര്‍ഷത്തോളം പ്രണയത്തിലായിരുന്നെന്നാണു യുവതി പറയുന്നത്. മഹാരാഷ്ട്ര ഉല്ലാസ് നഗറില്‍ ഗസ്റ്റ് ഹൗസിന്റെ മേല്‍നോട്ടം വഹിച്ചുവരികയായിരുന്ന ഇയാള്‍ ഭര്‍ത്താവും കുഞ്ഞുമുള്ള ബാര്‍ നര്‍ത്തകിയുമായി അടുപ്പത്തിലാവുകയായിരുന്നു. പിന്നീട് യുവതി ഭര്‍ത്താവിനെ ഉപേക്ഷിച്ച് ഇയാള്‍ക്കൊപ്പം ഉല്ലാസ് നഗറിലെ വാടകവീട്ടിലേക്കു താമസം മാറി.
രണ്ടുവര്‍ഷം ഒരുമിച്ച് താമസിച്ച ഇയാള്‍ ഒരാഴ്ച മുന്‍പ് യുവതി ഡാന്‍സ് ബാറില്‍ പോയ സമയത്ത് അലമാരയില്‍ സൂക്ഷിച്ചിരുന്ന പണവുമായി സ്ഥലം വിട്ടുവെന്നാണു പരാതി.
ജോലി കഴിഞ്ഞു വീട്ടില്‍ തിരിച്ചെത്തിയ യുവതി അലമാര പരിശോധിച്ചപ്പോഴാണു പണം നഷ്ടപ്പെട്ടതറിഞ്ഞത്. തുടര്‍ന്നു യുവതി കാമുകനെ കണ്ടുപിടിക്കാനായി കാസര്‍കോട്ടെത്തുകയായിരുന്നു.
ജില്ലയില്‍ എവിടെയാണ് ഇയാള്‍ താമസിക്കുന്നതെന്നു കൃത്യമായി അറിയില്ലെന്നും ഇയാളുടെ മൊബൈല്‍ നമ്പര്‍ മാത്രമാണ് തന്റെ പക്കലുള്ളതെന്നും യുവതി പൊലിസിനോട് പറഞ്ഞു.
പൊലിസ് ഈ നമ്പര്‍ കേന്ദ്രീകരിച്ച് അന്വേഷണം തുടങ്ങി.