വാഴക്കാട്: അനധികൃതമായി മണലെടുക്കുകയായിരുന്ന മൂന്നു തോണികള്‍ മണല്‍ ഉള്‍പ്പെടെ വാഴക്കാട് പൊലിസ് പിടികൂടി. കഴിഞ്ഞ ദിവസം അര്‍ധരാത്രി പൊലിസ് സബ് ഇന്‍സ്‌പെക്ട്ടര്‍ സന്തോഷിന്റെ നേതൃത്വത്തിലുള്ള പൊലിസ് സംഘമാണ് ചാലിയാറില്‍ നടത്തിയ പരിശോധനയ്ക്കിടെ കോലോത്തുംകടവ് എളമരം ഭാഗത്തുനിന്ന് മണല്‍ പിടികൂടിയത്.
മണല്‍ സ്‌ക്വാഡിന്റെ ബോട്ട് ഉപയോഗിച്ചായിരുന്നു പരിശോധന. തോണിയിലുണ്ടായിരുന്നവര്‍ പുഴയില്‍ ചാടി രക്ഷപ്പെട്ടു. പിടികൂടിയ തോണി രാവിലെ എളമരം കടവിലെത്തിച്ച് മണല്‍ പുഴയിലേക്ക് തട്ടിയതിനു ശേഷം മണ്ണുമാന്തി യന്ത്രം ഉപയോഗിച്ച് നശിപ്പിച്ചു. സബ് ഇന്‍സ്‌പെക്ടര്‍ എസ്. സന്തോഷ്, പൊലിസുകാരായ ബഷീര്‍ വാഴക്കാട്, രതീഷ് ഉറളിയന്‍, ഋഷികേഷ്, ശുഹൈബ്, രാഹുലന്‍, രാജന്‍, അസ്ഗര്‍ എന്നിവര്‍ റെയ്ഡിന് നേതൃത്യം നല്‍കി.