നിലമ്പൂര്‍: ഭൂമി കൈയേറിയെന്ന കേസില്‍ പി.വി അന്‍വര്‍ എം.എല്‍.എ കോടതിയില്‍ പണമടച്ച് കേസില്‍നിന്ന് ഒഴിവായി. പരാതിക്കാരനു നല്‍കാനുള്ള പണം നല്‍കിയില്ലെങ്കില്‍ എം.എല്‍.എയെ ഫെബ്രുവരി രണ്ടിന് അറസ്റ്റ് ചെയ്തു ഹാജരാക്കാന്‍ നേരത്തേ കോടതി വാറന്‍ഡ് പുറപ്പെടുവിച്ചിരുന്നു. കേസ് 21ന് വീണ്ടും പരിഗണിക്കാനിരിക്കേയാണ് അവധിക്കു കാത്തുനില്‍ക്കാതെ അതുവരെയുള്ള പരിശസഹിതം ഇന്നലെതന്നെ 1,14,270 രൂപ അടച്ചത്.
മഞ്ചേരിയില്‍ നൂറേക്കറോളം സ്ഥലം വാങ്ങി അന്‍വര്‍ തുടങ്ങിയ മെട്രോ വില്ല ഹൗസിങ് കോംപ്ലക്‌സ്, അമ്യൂസ്‌മെന്റ് പാര്‍ക്ക്, സ്‌കൂള്‍ എന്നിവിടങ്ങളിലേക്കുള്ള റോഡിന് വീതികൂട്ടുന്നതിന് കുടിയേറ്റ കര്‍ഷകനായ സി.പി ജോസഫിന്റെ 19 സെന്റ് സ്ഥലം വാങ്ങുകയായിരുന്നു. എന്നാല്‍, രാത്രി ജെ.സി.ബി ഉപയോഗിച്ച് റോഡ് ശരിയാക്കുന്നതിന്റെ മറവില്‍ നാല് സെന്റില്‍ കൂടുതല്‍ ഭൂമി അനധികൃതമായി എടുത്തുവെന്നായിരുന്നു പരാതി. 2008ലാണ് ജോസഫ് മഞ്ചേരി സബ് കോടതിയെ സമീപിച്ചിരുന്നത്.
ഈ കേസില്‍ 10 ശതമാനം പലിശ സഹിതം അന്‍വര്‍ 21,22,804 രൂപ നല്‍കണമെന്ന് കോടതി വിധിച്ചിരുന്നു. എന്നാല്‍, ആറു മാസമായിട്ടും പണം നല്‍കാതിരുന്നതോടെ ജോസഫ് വീണ്ടും കോടതിയെ സമീപിച്ചു. ഈ കേസിലായിരുന്നു കോടതി വാറന്‍ഡ് പുറപ്പെടുവിച്ചിരുന്നത്.