റിയാദ്: നിറയെ വിദ്യാര്‍ഥിനികളുമായി പോകുന്നതിനിടെ സ്‌കൂള്‍ ബസ് ഡ്രൈവര്‍ കുഴഞ്ഞുവീണു. ട്രാക്ക് മാറി അപകടത്തില്‍ പെടാനിരുന്ന ബസ് രണ്ടു വിദ്യാര്‍ഥിനികള്‍ മനോധൈര്യം സംഭരിച്ച് നിയന്ത്രിച്ചു നിര്‍ത്തിയതിനാല്‍ 55 ലേറെ വിദ്യാര്‍ഥിനികളുടെയും ഡ്രൈവറുടെയും ജീവന്‍ രക്ഷപ്പെട്ടു.

മക്കയിലെ ജുമൂമിലെ അബൂഅര്‍വ ഇന്റര്‍മീഡിയറ്റ്, സെക്കണ്ടറി വിദ്യാര്‍ഥിനികള്‍ സഞ്ചരിച്ച ബസിന്റെ ഡ്രൈവര്‍ രക്തത്തില്‍ പഞ്ചസാരയുടെ അളവ് ഗണ്യമായി കുറഞ്ഞതിനെ തുടര്‍ന്നാണ് ഓട്ടത്തിനിടെ ബോധരഹിതനായി വീണത്. സ്‌കൂള്‍ വിട്ട് വിദ്യാര്‍ഥിനികളെ വീടുകളിലാക്കുന്നതിന് തിരിച്ച ഉടനെയായിരുന്നു ഇത്. നിയന്ത്രണം വിട്ട ബസ് ട്രാക്ക് മാറുകയും കാര്‍ പാര്‍ക്കിംഗിലെ തൂണില്‍ ഇടിച്ച് വലതു വശത്തെ വിന്‍ഡോ ചില്ലുകള്‍ തകരുകയും ചെയ്തു. നിയന്ത്രണം വിട്ട ബസ് മെയിന്‍ റോഡ് ലക്ഷ്യമാക്കി നീങ്ങുന്നത് കണ്ട വിദ്യാര്‍ഥിനികളായ അശ്‌വാഖ് ബഖ്ഷും ഫാത്തിമ ഹസന്‍ അല്‍സ്വഅബും ചേര്‍ന്ന് ബസിന്റെ നിയന്ത്രണം വീണ്ടെടുത്ത് ബ്രേക്കിട്ട് നിര്‍ത്തുകയായിരുന്നു. മെയിന്‍ റോഡില്‍ ബസ്സ് കയറിയിരുന്നെങ്കില്‍ ചിത്രം മാറിയേനെ

സ്‌കൂള്‍ വാച്ച്മാന്‍ മുഹമ്മദ് അല്‍മഅ്ബദി ഡ്രൈവര്‍ക്ക് പ്രാഥമിക ശുശ്രൂഷകള്‍ നല്‍കി. വിദ്യാര്‍ഥിനികളെ പിന്നീട് ബദല്‍ ബസില്‍ കയറ്റിവിട്ടു. ജുമൂം ഗേള്‍സ് വിദ്യാഭ്യാസ വകുപ്പ് മേധാവി റുഖിയ്യ മുഹമ്മദും ഇന്റര്‍മീഡിയറ്റ്, സെക്കണ്ടറി സ്‌കൂള്‍ ഹെഡ്മിസ്ട്രസുമാരും വിദ്യാര്‍ഥിനികള്‍ക്ക് പ്രശംസാപത്രങ്ങള്‍ നല്‍കി.