തൃശ്ശൂര്‍: കേരളാ സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്‌സ് കോണ്‍ഫഡറേഷന്‍ സംസ്ഥാനതലത്തില്‍ 24ന് സൂചനാപണിമുടക്ക് നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. നിലവിലുള്ള സ്വകാര്യ ബസ് പെര്‍മിറ്റുകള്‍ നിലനിര്‍ത്തുക, വിദ്യാര്‍ഥികളുടെ യാത്രാനിരക്കുള്‍പ്പെടെ ബസ് ചാര്‍ജ് വര്‍ധിപ്പിക്കുക, വര്‍ധിപ്പിച്ച റോഡ് ടാക്‌സ് പിന്‍വലിക്കുക തുടങ്ങിയ ആവശ്യങ്ങളുന്നയിച്ചാണ് സമരം.
ഡീസല്‍ വിലവര്‍ധന ബസ് സര്‍വിസിനെ കടുത്ത സാമ്പത്തിക പ്രതിസന്ധിയിലേക്ക് എത്തിക്കുന്നതായി ഭാരവാഹികള്‍ പറഞ്ഞു. പരിഹാരം കണ്ടെത്തിയില്ലെങ്കില്‍ ഫെബ്രുവരി മുതല്‍ അനിശ്ചിതകാല ബസ് സമരത്തിലേക്ക് നീങ്ങുമെന്നും ഭാരവാഹികള്‍ അറിയിച്ചു. വാര്‍ത്താസമ്മേളനത്തില്‍ തൃശ്ശൂര്‍ ജില്ലാ പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ ഭാരവാഹികളായ എം.എസ് പ്രേംകുമാര്‍, ആന്റോ ഫ്രാന്‍സിസ്, കേരള ബസ് ഓപ്പറേറ്റേഴ്‌സ് ഫോറം ഭാരവാഹി ബിബിന്‍ ആലപ്പാട്ട്, കേരള സ്റ്റേറ്റ് പ്രൈവറ്റ് ബസ്് ഓപ്പറേറ്റേഴ്‌സ് കോ-ഓര്‍ഡിനേഷന്‍ കമ്മിറ്റി ഭാരവാഹി ജോസ് കുഴുപ്പില്‍, ആള്‍ കേരള ഓര്‍ഡിനറി പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ ഭാരവാഹി മോഹനന്‍ കാട്ടിക്കുളം തുടങ്ങിയവര്‍ പങ്കെടുത്തു.