ന്യൂയോര്‍ക്ക്: അമേരിക്കന്‍ പ്രസിഡന്റ് പദത്തില്‍ അവരോധിതനായ ആദ്യ ദിനത്തില്‍ തന്റെ സര്‍ക്കാരിന്റെ നയങ്ങള്‍ വ്യക്തമാക്കി ഡൊണാള്‍ഡ് ട്രംപ്. മുന്‍ പ്രസിഡന്റ് ബരാക് ഒബാമയുടെ ആരോഗ്യ ഇന്‍ഷുറന്‍സ് പദ്ധതിയായ ഒബാമ കെയര്‍ മരവിപ്പിച്ചുള്ള ഉത്തരവില്‍ ട്രംപ് ഒപ്പിട്ടു. നിലവില്‍ രണ്ടു കോടി ജനങ്ങള്‍ക്ക് ഗുണഫലം ലഭിക്കുന്ന പദ്ധതിയാണ് ഒബാമ കെയര്‍. നേരത്തെ തെരഞ്ഞെടുപ്പ് പ്രചാരണത്തില്‍ ട്രംപിന്റെ പ്രധാന വാഗ്ദാനമായിരുന്നു ഈ പദ്ധതി നിര്‍ത്തലാക്കുമെന്നത്.
ഒബാമ കെയറിലെ പല നിബന്ധനകളും സര്‍ക്കാരിന് സാമ്പത്തിക ബാധ്യത വരുത്തുന്നതാണെന്ന് ട്രംപ് നേരത്തെ ആരോപിച്ചിരുന്നു. പുതിയ ഉത്തരവോടെ ഒബാമ കെയറുമായി ബന്ധപ്പെട്ട എല്ലാ നടപടികളും നിര്‍ത്തിവയ്ക്കാന്‍ സര്‍ക്കാര്‍ ഏജന്‍സികളോട് ട്രംപ് ആവശ്യപ്പെട്ടു. പ്രസിഡന്റിന്റെ ഓഫിസില്‍ നിന്ന് ഇതുസംബന്ധിച്ച നിര്‍ദേശം ലഭിച്ചിട്ടുണ്ടെന്ന് ഏജന്‍സികള്‍ സ്ഥിരീകരിച്ചു.
തന്റെ ആദ്യ ദിനത്തില്‍ യു.എസ് മിസൈല്‍ പ്രതിരോധ ബില്ലിലും ട്രംപ് ഒപ്പുവച്ചു. രാജ്യത്തിന്റെ പ്രതിരോധ രംഗം കൂടുതല്‍ കരുത്തുറ്റതാക്കുമെന്ന് ഇതിലൂടെ പ്രഖ്യാപിക്കാന്‍ ട്രംപിന് സാധിച്ചു. ഇറാനില്‍ നിന്നും ഉത്തര കൊറിയയില്‍ നിന്നുമുള്ള ഭീഷണികളെ ചെറുക്കാന്‍ കൂടിയാണ് ഇതെന്ന് സൂചനയുണ്ട്. വെള്ളിയാഴ്ച്ച രാത്രിയാണ് ട്രംപ് സത്യപ്രതിജ്ഞ ചെയ്ത് അധികാരമേറ്റത്. പ്രഥമം അമേരിക്ക എന്നാണ് തന്റെ സര്‍ക്കാരിന്റെ നയമെന്ന് ട്രംപ് വ്യക്തമാക്കി.
അതേസമയം ഒബാമയുടെ നയങ്ങളെ തന്റെ ഭരണത്തില്‍ നിന്നും തീര്‍ത്തും ഇല്ലാതാക്കുന്ന രീതിയാണ് വൈറ്റ്ഹൗസിലെ ആദ്യ ദിനത്തില്‍ തന്നെ ട്രംപ് തുടങ്ങിവച്ചത്. വൈറ്റ് ഹൗസിന്റെ ഔദ്യോഗിക വെബ്‌സൈറ്റില്‍ നിന്ന് സ്വവര്‍ഗാനുരാഗികളുടെ അവകാശം, കാലാവസ്ഥാ വ്യതിയാനങ്ങള്‍, പൗരാവകാശ ചരിത്രം, ഒബാമയുടെ രാഷ്ട്രീയ അജണ്ടകള്‍ എന്നിവ ട്രംപ് വിഭാഗം നീക്കം ചെയ്തു കഴിഞ്ഞു. അനുബന്ധ മേഖലകളില്‍ ഒബാമയുടെ നയങ്ങളെ അവഗണിച്ച ട്രംപ് ഊര്‍ജം, വിദേശനയം, ജോലി, പുരോഗതി, സൈന്യം, നിയമനിര്‍മാണം, വ്യാപാര ബന്ധങ്ങള്‍ എന്നിങ്ങനെയുള്ള വിഷയങ്ങളില്‍ രാജ്യത്തിന്റെ താല്‍പര്യം എന്താണെന്നും ഉള്‍പ്പെടുത്തിയിട്ടുണ്ട്.