മെല്‍ബണ്‍: ഇന്ത്യയുടെ വെറ്ററന്‍ ഇതിഹാസം ലിയാണ്ടര്‍ പെയ്‌സും സ്വിറ്റ്‌സര്‍ലന്‍ഡ് താരം മാര്‍ട്ടിന ഹിംഗിസും ചേര്‍ന്ന സഖ്യം ആസ്‌ത്രേലിയന്‍ ഓപണ്‍ മിക്‌സ്ഡ് ഡബിള്‍സില്‍ വിജയത്തുടക്കമിട്ടു.
അതേസമയം ഇന്ത്യയുടെ മറ്റൊരു പ്രതീക്ഷയായിരുന്ന സാനിയ മിര്‍സയും ചെക്ക് റിപ്പബ്ലിക്കിന്റെ ബാര്‍ബര സ്‌ട്രൈക്കോവയും ചേര്‍ന്ന സഖ്യം വനിതാ ഡബിള്‍സിന്റെ പ്രീ ക്വാര്‍ട്ടറില്‍ പുറത്തായി.
പെയ്‌സും ഹിംഗിസും ചേര്‍ന്ന സഖ്യം ആദ്യ പോരാട്ടത്തില്‍ ആസ്‌ത്രേലിയന്‍ സഖ്യമായ മാര്‍ക്ക് പോള്‍മന്‍സ്- ഡെസ്റ്റനി അയാവ സഖ്യത്തെ കീഴടക്കി പ്രീ ക്വാര്‍ട്ടറിലേക്ക് മുന്നേറി. രണ്ടു സെറ്റ് മാത്രം നീണ്ട പോരാട്ടം അനയാസമായാണ് ഇന്തോ- സ്വിസ് സഖ്യം പിന്നിട്ടത്. സ്‌കോര്‍: 6-4, 6-3. 2015ല്‍ ഹിംഗിസിനൊപ്പം ഇവിടെ പെയ്‌സ് കിരീടം നേടിയിരുന്നു.
ജപ്പാന്റെ മിയു കറ്റോ- ഇറി ഹൊസുമി സഖ്യമാണ് സാനിയ- സ്‌ട്രൈക്കോവ സഖ്യത്തെ വീഴ്ത്തിയത്. സ്‌കോര്‍: 3-6, 6-2, 2-6. കഴിഞ്ഞ തവണ മാര്‍ട്ടിന ഹിംഗിസുമൊത്ത് ഇവിടെ വനിതാ ഡബിള്‍സ് കിരീടം സാനിയ സ്വന്തമാക്കിയിരുന്നു.