ദുബൈ: യുഎഇയിൽ ഇന്ന് മുതൽ താപനിലയിൽ നേരിയ കുറവ് അനുഭവപ്പെടുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. രാത്രിയിലും പുലർച്ചെയുമായി രാജ്യത്തിന്റെ വിവിധ ഭാഗങ്ങളിൽ ഈർപ്പം വർധിക്കുന്നതിനാൽ മൂടൽമഞ്ഞിനും നേരിയ മഞ്ഞുമൂടലിനും സാധ്യതയുണ്ടെന്നും അധികൃതർ മുന്നറിയിപ്പ് നൽകി. ഇന്ന് പൊതുവേ തെളിഞ്ഞ കാലാവസ്ഥയായിരിക്കുമെങ്കിലും രാവിലെ കിഴക്കൻ മേഖലകളിൽ താഴ്ന്ന മേഘങ്ങൾ രൂപപ്പെടാൻ സാധ്യതയുണ്ട്. തീരപ്രദേശങ്ങളിലും ദ്വീപുകളിലും 39 മുതൽ 45 ഡിഗ്രി സെൽഷ്യസ് വരെയും ഉൾപ്രദേശങ്ങളിൽ 44 മുതൽ 47 ഡിഗ്രി സെൽഷ്യസ് വരെയും പർവതപ്രദേശങ്ങളിൽ 33 മുതൽ 38 ഡിഗ്രി സെൽഷ്യസ് വരെയുമാണ് താപനില പ്രതീക്ഷിക്കുന്നത്.

മണിക്കൂറിൽ 20 കിലോമീറ്റർ വരെ വേഗതയിൽ വീശുന്ന കാറ്റ് ചില സമയങ്ങളിൽ 30 കിലോമീറ്റർ വരെ ശക്തിപ്രാപിച്ചേക്കും. അറേബ്യൻ ഗൾഫിലും ഒമാൻ കടലിലും തിരമാലകൾ പൊതുവേ ശാന്തമായിരിക്കുമെന്നും കാലാവസ്ഥാ കേന്ദ്രം അറിയിച്ചു.

നാളെയും താപനിലയിൽ വീണ്ടും നേരിയ കുറവ് രേഖപ്പെടുത്തും. രാത്രിയിലും തിങ്കളാഴ്ച പുലർച്ചെയുമായി ഈർപ്പം വർധിക്കുന്നതിനാൽ തീരദേശ, ഉൾപ്രദേശങ്ങളിൽ മൂടൽമഞ്ഞ് രൂപപ്പെടാൻ സാധ്യതയുണ്ട്. കാറ്റിന്റെ വേഗം ചില സമയങ്ങളിൽ മണിക്കൂറിൽ 35 കിലോമീറ്റർ വരെ എത്തുമെങ്കിലും കടൽ പൊതുവേ ശാന്തമായിരിക്കും.

തിങ്കളാഴ്ച മുതൽ കാലാവസ്ഥയിൽ കൂടുതൽ മാറ്റങ്ങൾ പ്രതീക്ഷിക്കുന്നതായി എൻസിഎം അറിയിച്ചു. കിഴക്കൻ മേഖലകളിൽ ഉച്ചയ്ക്കുശേഷം സംവഹന മേഘങ്ങൾ (Convective Clouds) രൂപപ്പെടുകയും ഒറ്റപ്പെട്ട മഴ ലഭിക്കാനും സാധ്യതയുണ്ട്. രാത്രിയിലും ചൊവ്വാഴ്ച പുലർച്ചെയുമായി വീണ്ടും മൂടൽമഞ്ഞ് അനുഭവപ്പെടാം.

ചില സമയങ്ങളിൽ കാറ്റിന്റെ വേഗം മണിക്കൂറിൽ 40 കിലോമീറ്റർ വരെ ഉയരുകയും പൊടിക്കാറ്റിന് സാധ്യതയുണ്ടാകുകയും ചെയ്യും. ഇതോടെ അറേബ്യൻ ഗൾഫിൽ കടൽ ചില സമയങ്ങളിൽ മിതമായതോ പ്രക്ഷുബ്ധമായതോ ആയേക്കും.

ചൊവ്വ, ബുധൻ ദിവസങ്ങളിൽ പൊതുവേ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥ തുടരുമെങ്കിലും കിഴക്കൻ, തെക്കൻ മേഖലകളിൽ ഉച്ചയ്ക്കുശേഷം വീണ്ടും മഴമേഘങ്ങൾ രൂപപ്പെടാനും പ്രാദേശിക മഴ ലഭിക്കാനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു. 

English summary : Temperatures are set to edge lower across the UAE on Saturday, while humid conditions are expected to bring a chance of fog and mist over parts of the country during the night and early morning, according to the National Center of Meteorology (NCM).