കാബൂള്‍: കിഴക്കന്‍ അഫ്ഗാനിസ്ഥാനില്‍ അഭയാര്‍ത്തി ക്യാമ്പിന്റെ മേല്‍ക്കുര തകര്‍ന്ന് ആറു പേര്‍ മരിച്ചു. അഭയാര്‍ഥി ക്യാമ്പിലെ വീട്ടില്‍ ഉറങ്ങിക്കിടന്ന ഒരേ കുടുംബത്തിലെ ആറു പേര്‍ക്കാണ് ജീവന്‍നഷ്ടമായതെന്ന് അധികൃതര്‍ വ്യക്തമാക്കി. രണ്ടു സ്ത്രീകളും രണ്ടു കുട്ടികളും മരിച്ചവരില്‍ ഉള്‍പ്പെടും. ഇതേ കുടുംബത്തിലെ നാലു പേര്‍ക്ക് പരുക്കേറ്റതായി നഗര്‍ഹര്‍ പ്രവിശ്യാ ഗവര്‍ണറുടെ വക്താവ് അത്താഹുല്ല ഖോഗിയാനി വെളിപ്പെടുത്തി.
തിങ്കളാഴ്ച അതിരാവിലെയായിരുന്നു അപകടം. പാക്കിസ്താനില്‍ നിന്നു തിരിച്ചെത്തി അഭയാര്‍ഥി ക്യാമ്പില്‍ കഴിയുകായിരുന്ന കുടുംബമാണ് അപകടത്തില്‍പ്പെട്ടത്. 15 ലക്ഷത്തോളം അഫാഗാനികള്‍ പാക്കിസ്താനിലെ അഭയാര്‍ഥി ക്യാമ്പുകളില്‍ കഴിയുന്നുണ്ട്. ആഭ്യന്തര യുദ്ധം താറുമാറാക്കിയ അഫ്ഗാനില്‍ മതിയായ സുരക്ഷ ഉറപ്പാക്കാന്‍ സാധിക്കാത്ത സാഹചര്യമാണ് ഇത്തരം അനിഷ്ട സംഭവങ്ങള്‍ക്ക് ഇടയാക്കുന്നത്.