ദമാം: കെ.എം.സി.സി സ്ഥാപക നേതാക്കളില്‍ പ്രമുഖനും സഊദി നാഷ്ണല്‍ കമ്മറ്റി ട്രഷററുമായ എഞ്ചിനീയര്‍ സി.ഹാഷിം സാഹിബ് (59) ഹൃദയാഘാതം മൂലം അന്തരിച്ചു.

കണ്ണൂര്‍ തലശ്ശേരി എടക്കാട് ഹിബയിലാണ് താമസം. 40 വര്‍ഷമായി സഊദിയിലുള്ള അദ്ദേഹം ഇന്ത്യന്‍ യൂണിയന്‍ മുസ്‌ലിംലീഗിന്റെ പ്രഥമ പ്രവാസി സംഘടനയായ ചന്ദ്രിക റീഡേഴ്‌സ് ഫോറത്തിന്റെ പ്രവര്‍ത്തനവുമായാണ് പ്രവാസ ലോകത്ത് സജീവമാകുന്നത്. പ്രവിശ്യയിലെ സെന്‍ട്രല്‍ കമ്മറ്റികളുടെ പ്രവര്‍ത്തനം ഏകോപിപ്പിക്കുന്നതിന് കിഴക്കന്‍ പ്രവിശ്യ കമ്മറ്റി എന്ന സംവിധാനത്തിന് തുടക്കം കുറിച്ചതും ഹാഷിം സാഹിബായിരുന്നു.

ഭാര്യ ഫിറോസ. മര്‍വ, നൂറുല്‍ഹുദ, ഹിബ, അബ്ദുല്‍ ഹാദി എന്നിവര്‍ മക്കളും ഡോ: സിറാജ് (ആസ്‌ട്രേലിയ), മന്‍സൂര്‍, ലുഖ്മാന്‍ (യു.എ.ഇ) എന്നിവര്‍ മരുമക്കളുമാണ്. ദമാം സെന്‍ട്രല്‍ ആശുപത്രിയില്‍ സൂക്ഷിച്ചിരിക്കുന്ന മയ്യത്ത് നാട്ടില്‍ എത്തിക്കുന്നതിനുള്ള നടപടികള്‍ പുരോഗമിക്കുന്നുവെന്ന് കെ എം സി സി നേതാക്കള്‍ അറിയിച്ചു.