മലപ്പുറം: സംസ്ഥാനത്തെ സ്‌കൂളുകളില്‍ അധിക തസ്തിക അനുവദിച്ചതുമായി ബന്ധപ്പെട്ട് സൂപ്പര്‍ ചെക്ക് സെല്ലിന്റെ പരിശോധന ഒരുമാസംകൂടി ദീര്‍ഘിപ്പിച്ചു. 2016-17, 2017-18 വര്‍ഷങ്ങളില്‍ വിദ്യാലയങ്ങളില്‍ കുട്ടികളുടെ എണ്ണം വര്‍ധിച്ചതിന് ആനുപാതികമായി വര്‍ധിപ്പിച്ച അധിക തസ്്തിക സംബന്ധിച്ച കര്‍ശന പരിശോധനയാണ് ജനുവരി 31 വരെ ദീര്‍ഘിപ്പിച്ച് ഉത്തരവായിരിക്കുന്നത്്. 2017 ഡിസംബറില്‍ തന്നെ പരിശോധന പൂര്‍ത്തിയാക്കി പൊതുവിദ്യാഭ്യാസ വകുപ്പിന് റിപ്പോര്‍ട്ട് സമര്‍പ്പിക്കാനായിരുന്നു നേരത്തെയുണ്ടായിരുന്ന നിര്‍ദേശം. ക്രിസ്മസ് പരീക്ഷ, തുടര്‍ന്നുണ്ടായ സ്‌കൂള്‍ അവധി എന്നീ കാരണങ്ങളാലാണ് ഇപ്പോള്‍ ഒരുമാസംകൂടി പരിശോധനക്ക് സമയം അനുവദിച്ചിരിക്കുന്നത്്.
2016 ജനുവരി 29ന് ശേഷം എയ്ഡഡ് സ്‌കൂളുകളിലുണ്ടായ അധിക തസ്തികകള്‍ അനുവദിക്കുന്നതിനായി സ്പാര്‍ക്കില്‍ നല്‍കിയ വിദ്യാര്‍ഥികളുടെ പേരുവിവരങ്ങള്‍ ശരിയാണോ, ഏതെങ്കിലും രീതിയിലുള്ള ക്രമക്കേടുകള്‍ നടന്നിട്ടുണ്ടോ എന്നീ കാര്യങ്ങളാണ് സൂപ്പര്‍ ചെക്ക് സെല്‍ പരിശോധനക്ക് വിധേയമാക്കുന്നത്.