കരൂപ്പടന്ന: വൈദ്യുതിത്തൂണില്‍ സ്ഥാപിച്ചിരുന്ന ഫ്‌ലക്‌സ് ബോര്‍ഡ് കാറ്റില്‍ തെറിച്ച് തലയില്‍ വീണ് ബൈക്ക് യാത്രക്കാരന് പരുക്കേറ്റു. കോണത്തുകുന്ന് തൂപ്രത്ത് രഞ്ജിത് ബാബു (39)വിനാണ് പരുക്കേറ്റത്. രഞ്ജിത് ബാബു സുഹൃത്തിന്റെ ബൈക്കിന് പുറകിലിരുന്ന് ഇരിങ്ങാലക്കുടയിലേക്ക് പോവുകയായിരുന്നു. വെള്ളാങ്ങല്ലൂര്‍ വര്‍ക്ക്‌ഷോപ്പ് ജങ്ഷന് സമീപമാണ് അപകടം ഉണ്ടായത്.
വേണ്ടത്ര ഉറപ്പില്ലാതെ ബോര്‍ഡ് സ്ഥാപിച്ചതാണ് അപകടത്തിന് കാരണമായത്. മൂക്കിന് സാരമായ പരുക്കേറ്റ രഞ്ജിത്ത് ബാബുവിനെ ഇരിങ്ങാലക്കുട സഹകരണ ആശുപത്രിയില്‍ പ്രവേശിപ്പിച്ചു. ഇരിങ്ങാലക്കുട ഡി.ഇ.ഒ. ഓഫിസിലെ ജീവനക്കാരനാണ് രഞ്ജിത് ബാബു.